IDS: બ્લેક મની ધરાવતા લોકો પાસે વિગતો માગશે IT ડિપાર્ટમેન્ટ

નવી દિલ્હીઃ ઇન્કમટેક્સ વિભાગનો એવી સંસ્થાઓ પાસે વિગતો માગવાનો ઇરાદો છે, જેમના વિશે તેની પાસે બિનહિસાબી મિલકત રાખવાની ખાસ માહિતી છે. ઇન્કમ ડિસ્ક્લોઝર સ્કીમ (IDS) અંતર્ગત ઇન્કમટેક્સ ડિપાર્ટમેન્ટ આ પગલું ભરવા જઈ રહ્યો છે. સૂત્રોના જણાવ્યાનુસાર, આ પ્રકારના પગલાથી કાળું નાણું ધરાવતા લોકો માટે સમસ્યા ઊભી થઈ શકે છે.

સૂત્રોના જણાવ્યાનુસાર, આ પ્રકારની સંસ્થાઓ પાસે ઇન્કમ ડિસ્ક્લોઝર સ્કીમમાં સામેલ થવાની તક છે. આ યોજના 30મી સપ્ટેમ્બરે બંધ થઈ રહી છે. ટેક્સ ડિપાર્ટમેન્ટની યોજના એવા લોકોને ઇ-મેઇલ મોકલવાની છે, જેમના વિશે તેઓ ટેક્સેબલ ઇન્કમનો ખુલાસો કરતા ન હોવાની ખાસ માહિતી છે. આ ઇ-મેઇલમાં આવી સંસ્થાઓના એ મામલાનું પણ ઉદાહરણ આફવામાં આવશે, જેમણે આવક છુપાવી છે. તેમની પાસે આ વિશે સ્પષ્ટીકરણ માગવામાં આવે. આ સંસ્થાઓને આવા મેઇલ આવતા મહિનાની શરૂઆતમાં મળશે.

આ પ્રકારની પ્રક્રિયામાં એ સુનિશ્ચિત કરવામાં આવશે કે ટેક્સપેયર્સના મનમાં કોઈ પણ પ્રકારનો ભય ઊભો કરવામાં નહિ આવે. આ પ્રકારના તમામ મેઇલ સંપૂર્ણપણે ગુપ્ત રાખવામાં આવશે. કાળાં નાણાંને બહાર લાવવાના પ્રયાસો અંતર્ગત સરકાર આ પ્રકારની સંસ્થાઓને આગળ આવીને આઈડીએસ યોજનામાં ભાગ લેવા જણાવશે. નાણાપ્રધાન અરુણ જેટલી ઘણી વાર કાળું નાણું ધરાવતા લોકોને આ યોજનાનો લાભ ઉઠાવવાનું કહી ચૂક્યા છે.