કેટલાંક સેક્ટર્સમાં તરલતાની સમસ્યા ઉકેલવી જરૂરી: જેટલી

67019531 નવી દિલ્હી:નાણાપ્રધાન અરુણ જેટલીના જણાવ્યા અનુસાર સિસ્ટમમાં તરલતાની કોઈ સમસ્યા નથી, માત્ર કેટલાંક સેક્ટર્સની લિક્વિડિટી ખેંચને ઉકેલવાની જરૂર છે. RBIની મહત્ત્વની બોર્ડ મિટિંગના થોડા દિવસ પહેલાં તેમણે જણાવ્યું હતું કે, “સરકાર સુપ્રીમ કોર્ટના આદેશ પછી ‘આધાર’ મુદ્દે ઉકેલ શોધવાના નિર્ણાયક તબક્કામાં છે.”

જેટલી ફેબ્રુઆરીમાં છઠ્ઠું બજેટ રજૂ કરવાના છે ત્યારે તેમણે લોકસભા ચૂંટણી અંગે જણાવ્યું હતું કે, “નરેન્દ્ર મોદીએ 2019માં ફરી ચૂંટાવા માટે પૂરતાં કામ કર્યાં છે. રાજ્યોની ચૂંટણી સામાન્ય રીતે પ્રાદેશિક મુદ્દા પર લડાતી હોય છે. લોકસભા ચૂંટણીના એજન્ડા અલગ હોય છે.” ઉલ્લેખનીય છે કે, થોડા સમય પહેલાં પૂરી થયેલી પાંચ રાજ્યની ચૂંટણીનાં પરિણામ મંગળવારે જાહેર થવાનાં છે.

જેટલીએ લોકોને પૂરતી રોજગારી નહીં મળી હોવાની વાતને ફગાવી દીધી હતી. તેમણે કહ્યું હતું કે, એવું હોત તો લોકોમાં અસંતોષ જોવા મળ્યો હોત. તેમણે કહ્યું હતું કે, “કન્સ્ટ્રક્શન સેક્ટરમાં પુન: સંચાર અને મુદ્રા યોજનાને કારણે રોજગારી સર્જનમાં મદદ મળી છે.” RBI બોર્ડની બેઠક ૧૪ ડિસેમ્બરે મળવાની છે. જેમાં સરકારના નોમિની દ્વારા ગયા મહિનાની મિટિંગમાં પુછાયેલા પ્રશ્નોના જવાબની ચર્ચા કરાશે.

જેટલીના નિવેદન પરથી જણાય છે કે, રિયલ એસ્ટેટ તેમજ માઈક્રો, સ્મોલ અને મીડિયમ એન્ટરપ્રાઇઝિસ (MSMEs)ના મુદ્દાની ફરી ચર્ચા થશે. જેટલીએ ETને કહ્યું હતું કે, “એકંદરે તરલતાની સમસ્યા નથી, પણ અર્થતંત્રમાં કેટલાંક સેક્ટર્સમાં તરલાની ખેંચ હોઈ શકે. એટલે આ સેક્ટર્સની સમસ્યાનો ઉકેલ જરૂરી છે.”

સરકાર નોન-બેન્કિંગ ફાઇનાન્સ કંપનીઓ માટે સ્પેશિયલ રિફાઇનાન્સ વિન્ડોની માંગણી કરી રહી છે. જેટલીએ અન્ય હિસ્સેદારોને સમાવવા RBIની વિવિધ સમિતિના પુન:ગઠન અંગે નિવેદનનો ઇનકાર કર્યો હતો. જોકે, તેમણે આ બાબતે વાટાઘાટ થઈ રહી હોવાનો સંકેત આપ્યો હતો. RBIનું નામ લીધા વગર જેટલીએ કહ્યું હતું કે, “એપેલટ ઓથોરિટીને જવાબદાર ન હોય એવા નિયમનકર્તાઓએ યોગ્ય નિર્ણય લેવા અન્ય હિસ્સેદારોને સાંકળવા જરૂરી છે.”