ચીનનો ટોણો: ભારત અમારા સામાન પર પ્રતિબંધ મૂકવાને બદલે મહેતન કરતા શીખે

ચીનના સરકારી મીડિયાએ પોતાના દેશના અબજોપતિ ઉદ્યોગપતિ જેક માની 996 ફોર્મ્યુલાનો ઉપયોગ ભારતને ટોણો મારવા કર્યો છે. ગ્લોબલ ટાઈમ્સ અખબારના એક લેખ અનુસાર ભારત પોતાના બિનસક્ષમ ઉત્પાદન ક્ષેત્રને કારણે ચીનની આગળ કોઈ સંજોગોમાં નીકળી શકે તેમ નથી. આ કારણે જ ભારત પોતાની ક્ષમતા વધારવાને બદલે ચાઈનીઝ માલ-સામાન પર પ્રતિબંધ મૂકવાના પ્રયાસ કરતું રહે છે. હવે સીધા Whatsapp પર મેળવો મહત્વના ન્યૂઝ, શરુ કરવા ક્લિક કરો ચીનના બિલિયોનેર જેક માએ હાલમાં જ એવું નિવેદન આપ્યું હતું કે યુવાનોએ અઠવાડિયામાં છ દિવસ સવારે નવથી રાત્રે નવ વાગ્યા સુધી કામ કરવું જોઈએ. પોતાની 996 ફોર્મ્યુલાને કારણે જેક મા ખાસ્સા ચર્ચામાં આવ્યા હતા. જેક માના આ જ નિવેદન પર ગ્લોબલ ટાઈમ્સે લખ્યું છે કે ભારતે 996 ફોર્મ્યુલા ગંભીરતાથી લેવાની જરુર છે, તેનાથી જ તે પોતાના ઉત્પાદન ક્ષેત્રની કાર્યક્ષમતા વધારી શકશે. 996થી ભારત બિઝનેસ એન્વાયર્મેન્ટને સુધારી શકશે, વિદેશી રોકાણ આકર્ષી શકશે અને મેન્યુફેક્ચરિંગ સેક્ટરને સ્પર્ધાત્મક બનાવી શકશે. ભારતમાં ઉત્પાદન ક્ષેત્ર ધીમું પડ્યું છે તેવા સમયે જ આ આર્ટિકલ પ્રસિદ્ધ થયો છે. સત્તાવાર આંકડા અનુસાર ભારતમાં મેન્યુફેક્ચરિંગ ગ્રોથ 3.6 ટકા સાથે ત્રણ વર્ષના સૌથી નીચા સ્તરે આવી ગયો છે. ગયા વર્ષે આ આંકડો 4.4 ટકા હતો. ગ્લોબલ ટાઈમ્સના આર્ટિકલમાં એવું પણ જણાવાયું છે કે, ભારતના પ્રતિબંધોથી ચીને ચિંતા કરવાની કોઈ જરુર નથી. કારણકે ભારતનું મેન્યુફેક્ચરિંગ સેક્ટર ચીની તોલે આવી શકે તેમ નથી અને માર્કેટની જરુરિયાત સ્પર્ધાત્મક કિંમતે પૂરી કરી શકે તેમ નથી. અખબારે એમ પણ કહ્યું છે કે, ટૂંકાગાળા માટે રાષ્ટ્રવાદનું ભૂત કદાચ કેટલાક ભારતીયોને ચીની સામાનનો બોયકોટ કરવા ઉશ્કેરે, પરંતુ લાંબા ગાળે તો તેઓ સસ્તી કિંમતમાં મળતી સારી વસ્તુઓને જ પસંદ કરશે.