પ્રોફિટ બુકિંગથી સેન્સેક્સમાં 364 પોઈન્ટનું જંગી ગાબડું

મુંબઈ: વિક્રમ ટોચે ટ્રેડ થયાના બીજા દિવસે આજે ITC સહિતના FMCG શેરોમાં ધૂમ વેચલાલીથી મુંબઈ શેરબજારનો સેન્સેક્સ 364 પોઈન્ટ અથવા 1.13 ટકા ઘટીને બંધ રહ્યો હતો.

આજે સવારથી જ શેરબજારમાં વૈશ્વિક રાહે વેચવાલીનું દબાણ જોવા મળ્યું હતું. GST કાઉન્સિલે સોમવારે સિગારેટ પર કોમ્પનસેશન સેસ વધારતાં FMCG શેરોમાં ભારે વેચવાલી જોવા મળી હતી. ઊંચા મથાળે ભારે વેચવાલીથી અન્ય સેક્ટોરલ ઈન્ડાઇસિસ પણ રેડ ઝોનમાં બંધ રહ્યા હતા.

આજે દિવસ દરમિયાન BSE સેન્સેક્સ ઉપરમાં 31911.61 અને નીચામાં 31626.44 પોઈન્ટની રેન્જમાં અથડાયા બાદ 363.79 પોઈન્ટના ધોવાણ સાથે 31,710.99 પોઈન્ટની સપાટીએ બંધ રહ્યો હતો.

નેશનલ સ્ટોક એક્સચેંજનો નિફ્ટી ઉપરમાં 9,885.35 અને નીચામાં 9,792.05 પોઈન્ટની રેન્જમાં ટ્રેડ થયા બાદ 88.80 પોઈન્ટ ગગડીને 9,827.15 પોઈન્ટની સપાટીએ બંધ રહ્યો હતો.

BSE મિડકેપ અને BSE સ્મોલકેપ ઈન્ડેક્સ અનુક્રમે 0.63 ટકા અને 0.57 ટકા ઘટીને બંધ રહ્યા હતા.

આજે અન્ય સેક્ટોરલ ઈન્ડાઇસિસમાં BSE FMCG ઈન્ડેક્સ 6.12 ટકા, BSE રિયલ્ટી ઈન્ડેક્સ 1.10 ટકા, BSE ઓઈલ-ગેસ ઈન્ડેક્સ 0.79 ટકા અને BSE કન્ઝ્યુમર ડ્યુરેબલ્સ ઈન્ડેક્સ 0.66 ટકા ઘટીને બંધ રહ્યા હતા.