લક્ઝરી ચીજવસ્તુઓના માર્કેટમાં તેજી અને મંદીનો મિશ્ર માહોલ

71490070 વરુણી ખોસલા/અનુમેહા ચતુર્વેદી

I am Gujarat

નવી દિલ્હી:તહેવારોની સીઝન ચાલી રહી છે ત્યારે ભારતના લક્ઝરી ચીજવસ્તુઓના બજારમાં તેજી અને મંદીનો મિશ્ર માહોલ છે. નજીકના ગાળા માટે આ માર્કેટ એટલું સારું નથી લાગતું પરંતુ લાંબા ગાળા માટે આ બજારમાં તેજી લાગી રહી છે. અર્થતંત્રમાં નરમાઈ હોવાથી એકંદર માંગ ઘટી છે અને આ વખતના તહેવારોની સીઝનમાં વેચાણમાં જોઈએ તેવો ઉછાળો નથી થયો. પરંતુ અમુક બ્રાન્ડ્સ તથા સેગમેન્ટ્સનું પ્રદર્શન સતત સારું રહ્યું છે. ભારતીયો જ્યારે વિદેશમાં ફરવા જાય છે ત્યારે લક્ઝરી વસ્તુઓ ખરીદે છે.

નવી દિલ્હીના વસંતકુંજ વિસ્તારમાં આવેલા DLF એમ્પોરિયો મોલમાં લુઇસ વિટ્ટોન, બર્બરી, જિમી ચૂ અને ગુચી જેવી ટોચની ઇન્ટરનેશનલ લક્ઝરી બ્રાન્ડ્સ મળે છે. આ મોલમાં લક્ઝરી શોપિંગ ફેસ્ટિવલ શરૂ થયો છે, નવા ડ્રેસથી સ્ટોર્સ સજી રહ્યા છે, સેલ્સમેન સજીધજીને ગ્રાહકોને આવકારવા તૈયાર છે અને તમામ બ્રાન્ડ્સને આ વખતે વેચાણ વધવાની આશા છે. પરંતુ ગ્રાહકોમાં ઉત્સાહનો અભાવ છે. મોલમાં ફરતા ગ્રાહકોમાંથી બહુ ઓછા લોકોના હાથમાં શોપિંગ બેગ છે. મોલના કર્મચારીઓ સ્વીકારે છે કે, ગયા વર્ષની સરખામણીએ આ વખતે બજાર નરમ છે. મુંબઈના પેલેડિયમ મોલની વાત કરીએ તો, અહીં પણ આવી જ સ્થિતિ છે.

લક્ઝરી ગૂડ્ઝ સેક્ટરમાં વર્ષનું સૌથી વધુ વેચાણ તહેવારોની સીઝનમાં થતું હોય છે. તાજેતરનાં વર્ષોમાં વિવિધ નીતિવિષયક ફેરફારો થયા હોવાથી આ સેક્ટરને વેચાણમાં વધારો થવાની અપેક્ષા છે. “અમને તો નેગેટિવ સેન્ટિમેન્ટનો અનુભવ થયો નથી.

અમારી કેટલીક બ્રાન્ડ્સનું વેચાણ ઘણું સારું છે અને કેટલીક બ્રાન્ડ્સનું વેચાણ ખરાબ છે. પરંતુ અમારી સામે આવતા એકાદ સપ્તાહમાં અને દિવાળીની નજીકના ગાળામાં સમગ્ર ચિત્ર સ્પષ્ટ થઈ જશે.” એમ DLFના લક્ઝરી રિટેલ અને હોસ્પિટાલિટી વર્ટિકલના એક્ઝિક્યુટિવ વાઇસ પ્રેસિડન્ટ દિનાઝ માધુકરે કહ્યું હતું. DLFનું આ વર્ટિકલ દિલ્હીના ચાણક્ય અને એમ્પોરિયો જેવા અપસ્કેલ મોલનું સંચાલન કરે છે.

પેલેડિયમનું સંચાલન કરતી કંપની ફોએનિક્સ મિલ્સનાં ડિરેક્ટર ગાયત્રી રુઈયા પણ સમાન સૂર વ્યક્ત કરતાં જણાવે છે કે, “આ વર્ષે અમને 5-6 ટકાની વચ્ચે વૃદ્ધિ થવાની ધારણા છે. ગ્રાહકો હજુ પણ લક્ઝરી વસ્તુઓ ખરીદે છે.”