Q1 પરિણામ, મેક્રો ડેટા બજારને દોરશે

નવી દિલ્હી: આ સપ્તાહે જાહેર થનારા મેક્રોઈકોનોમિક ડેટા તેમજ પ્રથમ ક્વાર્ટરના કંપની પરિણામો શેરબજારની ચાલ પર અસર કરશે. બજાર નિષ્ણાતોના જણાવ્યા અનુસાર
સોમવારથી શરૂ થઈ રહેલા નવા ટ્રેડિંગ સપ્તાહે TCS અને ઈન્ફોસિસ વગેરે બ્લુચિપ કંપનીઓ તેના પ્રથમ ક્વાર્ટરના પરિણામની જાહેરાત કરશે. આ સપ્તાહે ફુગાવાના તેમજ
ઔદ્યોગિક ઉત્પાદન આંક પણ જાહેર થશે.

જિયોજિત ફાઈનાન્શિયલ સર્વિસિસના રિસર્ચ વિભાગના વડા વિનોદ નાયરના જણાવ્યા અનુસાર, GSTના અડચણ રહિત અમલીકરણ બાદ બજાર હવે પ્રથમ ક્વાર્ટરના નાણાકીય પરિણામો, IIP, CPI, અને WPI ડેટા પર મીટ માંડી રહ્યું છે.

આગામી તારીખ 13 જૂલાઈના રોજ TCS જ્યારે 14 જૂલાઈના રોજ ઈન્ફોસિસ તેના પ્રથમ ક્વાર્ટરના પરિણામોની જાહેરાત કરશે. HDFC પ્રાયવેટ ક્લાયન્ટ ગ્રુપના વડા વી કે શર્માએ જણાવ્યું હતું કે, આ સપ્તાહે કંપનીઓના નાણાકીય પરિણામોના શ્રીગણેશ થશે અને આ સપ્તાહે મહત્ત્વના મેક્રો ડેટા પણ જાહેર થશે.

બુધવારે મે મહિનાનો ઔદ્યોગિક ઉત્પાદન આંક તેમજ જૂનનો CPI આધારિત ફુગાવાનો દર જાહેર થશે. ત્યારબાદ શુક્રવારે જથ્થાબંધ ભાવાંક (WPI)આધારિત ફુગાવાનો દર જાહેર થશે.

આમ્રપાલી આદ્ય ટ્રેડિંગ એન્ડ ઈન્વેસ્ટમેન્ટ્સના ડિરેક્ટર અને રિસર્ચ હેડ અબનીશ કુમાર સુદ્ધાંશુએ કહ્યું હતું કે, આગામી દિવસોમાં શેરબજાર ફુગાવા અને ઔદ્યૌગિક ઉત્પાદનના આંકડા પ્રમાણે તાલ મીલાવશે.

સોમવારે જ્યારે બજાર ખુલશે ત્યારે શુક્રવારના રોજ જાહેર થયેલા USના જોબ ડેટાની અસર જોવા મળે તેવી શક્યતા છે.

વિતેલા સપ્તાહે BSE સેન્સેક્સ 439.02 પોઈન્ટ અથવા 1.41 ટકા જ્યારે નેશનલ સ્ટોક એક્સચેંજનો નિફ્ટી 144.90 પોઈન્ટ અથવા 1.52 ટકા વધીને બંધ રહ્યો હતો.