કેરળ પ્લેન ક્રેશ: વીમા કંપનીઓને ચૂકવવા પડશે આટલા અબજ રુપિયા!

બેંગલુરુ: કેરળના કોઝિકોડમાં ગયા સપ્તાહે એર ઈન્ડિયા એક્સપ્રેસનું પેસેન્જર એરક્રાફ્ટ ક્રેશ થયાની ઘટના વીમા કંપનીઓને ઘણી મોંઘી પડશે. એક અંદાજ અનુસાર, નોન-લાઈફ ઈન્શ્યોરન્સ કંપનીઓને તેના માટે 400 કરોડ રુપિયા જેટલી તગડી રકમ ચૂકવવી પડી શકે છે.

હાલમાં જ આવેલા એમ્ફાન વાવાઝોડાંથી કોલકાતામાં થયેલા ભારે નુક્સાન, મુંબઈમાં થયેલા ભારે વરસાદ અને જવાહર નહેરુ પોર્ટમાં થયેલા નુક્સાન બાદ પ્લેન ક્રેશની ઘટના વીમા કંપનીઓને મોંઘી પડવાની છે. ન્યૂ ઈન્ડિયા ઈન્શ્યોરન્સ કંપનીના સૂત્રોનું માનીએ તો, પૂરતી તપાસ બાદ માત્ર પ્લેન ક્રેશની ઘટનામાં 375 કરોડ રુપિયા જેટલી રકમ ચૂકવવી પડી શકે છે.

પ્લેન ક્રેશમાં 16 લોકોના પણ મોત થયા છે. એર ઈન્ડિયાએ લીધેલી વીમા પોલીસી અંતર્ગત જો પ્લેન ક્રેશમાં કોઈ પેસેન્જરનું મોત થાય તો વીમા કંપનીએ તેના બદલ 1 કરોડ રુપિયા ચૂકવવા પડે છે. આ સિવાય એર ઈન્ડિયાએ એડિશનલ ઈન્શ્યોરન્સ પણ લીધો છે, જેમાં મૃત્યુના કેસમાં વીમા કંપનીની જવાબદારી વધીને 1.3 કરોડ જેટલી થાય છે.

પેસેન્જર સિવાય કોઝિકોડ પ્લેન ક્રેશમાં એર ઈન્ડિયાના બે પાઈલટના પણ મોત થયા હતા. તેમને પણ વીમા કંપનીએ એમ્પ્લોઈ ઈન્શ્યોરન્સ સ્કીમ હેઠલ ક્લેમ ચૂકવવો પડશે. આ ઘટનામાં જે જાનહાની અને મુસાફરોને જે અન્ય નુક્સાન થયું છે તેના વીમા કંપનીએ અંદાજે 25 કરોડ રુપિયા ચૂકવવા પડશે તેવી શક્યતા છે.

પ્લેન ક્રેશમાં 100 જેટલા મુસાફરોને નાની-મોટી ઈજા પણ થઈ છે. તેમની સારવારમાં જેટલો ખર્ચો આવશે તે પણ વીમા કંપનીએ ચૂકવવો પડશે. આ દુર્ઘટનામાં 168 પેસેન્જર અને 4 ક્રુ મેમ્બર્સનો બચાવ થયો છે. ઈજાગ્રસ્તો દ્વારા જે ક્લેમ પાછળથી ફાઈલ કરવામાં આવે તે પણ કંપનીએ ચૂકવવાના રહેશે. હાલ ઘાયલોને કેટલી રકમ ચૂકવવી પડશે તેની ચોક્કસ માહિતી વીમા કંપનીઓ પાસે પણ નથી.

એર ઈન્ડિયાએ 2020માં પોતાના 170 એરક્રાફ્ટનો 10 અબજ ડોલરનો વીમો લીધો છે, અને તેના પ્રિમિયમ પેટે તેણે 30 મિલિયન ડોલર એટલે કે 224 કરોડ રુપિયા ચૂકવ્યા હતા.