સોફ્ટબેન્કના મોબાઇલના મેગા IPOનો ફ્લોપ-શો: શેર 15% ગબડ્યો

67171991 ટોકયો:જાપાનની સોફ્ટબેન્કના મોબાઇલ યુનિટના વિશ્વના બીજા સૌથી મોટા IPOએ રોકાણકારોને નિરાશ કર્યા છે. કંપનીએ IPO દ્વારા લગભગ 23.5 અબજ ડોલરનું ભંડોળ એકત્ર કર્યું હતું, જે 2014માં અલીબાબાના IPO પછી વિશ્વભરમાં સૌથી વધુ છે. જોકે, સોફ્ટબેન્ક કોર્પનો શેર 1,500 યેનની ઓફર પ્રાઇસ સામે 1,463 યેનના સ્તરે ખૂલ્યો હતો અને IPO પ્રાઇસથી 14.5 ટકા ઘટીને 1,282 યેન પર બંધ રહ્યો હતો.

વિશ્લેષકોના જણાવ્યા અનુસાર IPO યોગ્ય સમયે આવ્યો ન હતો. ખાસ કરીને નવી કંપની માટે આ સારો સમય નથી. છેલ્લા કેટલાક મહિનાથી વૈશ્વિક બજારોમાં વોલેટિલિટી છે અને જાપાને મોબાઇલ ઓપરેટર્સના ઊંચા ભાવ સામે કડક વલણ અપનાવ્યું છે.

કેટલાકના મતે ચાલુ મહિને ટેક્‌નિકલ ખામીના કારણે સોફ્ટબેન્ક અને UK મોબાઇલ ફોન ઓપરેટર O2ના ગ્રાહકોને પરેશાની વેઠવી પડી હતી. જેની પણ સેન્ટિમેન્ટ પર પ્રતિકૂળ અસર થઈ હતી. રેકુટેન સિક્યોરિટીઝના સિનિયર માર્કેટ એનાલિસ્ટ માસાયુકી તોશિદાએ જણાવ્યું હતું કે, “ચાઇનીઝ કંપની હુઆવીના પ્રકરણને કારણે વૈશ્વિક સુરક્ષાની ચિંતાથી માહોલ ખરાબ થયો હતો અને લિસ્ટિંગના દિવસે શેરની માંગ બહુ ઓછી હતી.”

ટોકયોના એક એનાલિસ્ટે જણાવ્યું હતું કે, “સોફ્ટબેન્ક હુઆવીના પાર્ટ્સનો ઉપયોગ નહીં કરી શકે અને એટલે તેનો રોકાણખર્ચ વધવાની આશંકાથી શેરમાં ખરીદી ન હતી.”
ઉલ્લેખનીય છે કે, સોફ્ટબેન્કે મોબાઇલ યુનિટના ત્રીજા ભાગના હિસ્સાનો IPO કર્યો હતો અને શેર દીઠ 1,500 યેનના ભાવે 1.76 અબજ શેર્સનું વેચાણ કરી 1987ના NTT અને 1998ના NTT ડોકોમોના અગાઉના રાષ્ટ્રીય રેકોર્ડને તોડ્યો હતો.

સોફ્ટબેન્કના મોબાઇલ યુનિટનો IPO પ્રમોટર માસાયોશી સોનની કંપનીને જાપાનની ટેલિકોમ કંપનીમાંથી વૈશ્વિક હાઈ-ટેક ઇન્વેસ્ટમેન્ટ ફર્મ બનાવવાની યોજનાનો ભાગ છે. સોને જણાવ્યું છે કે, IPOમાંથી એકત્ર ભંડોળને સોફ્ટબેન્ક વિઝન ફંડમાં ઠાલવવામાં આવશે, જે ૧૦૦ અબજ ડોલર હોવાનો અંદાજ છે.