IRCTC IPO: 10 દિવસમાં રોકાણ ‘ડબલ'

71592370 નવી દિલ્હી:IPO માર્કેટમાં આ વખતે દિવાળી વહેલી આવી છે. IRCTCના શેર સોમવારે લિસ્ટિંગના દિવસે 129 ટકાનો ઉછાળો દર્શાવ્યો હતો. ₹320ના ઇશ્યૂ પ્રાઇસ સામે શેર BSE પર 127.7 ટકાની છલાંગ સાથે ₹728.60ના મથાળે બંધ રહ્યો હતો.

પ્રારંભિક સત્રમાં શેર 101.25 ટકાની વૃદ્ધિ સાથે ₹644ના ભાવે લિસ્ટ થયો હતો. ઇન્ટ્રા-ડે શેર 132.4 ટકા વધીને ઊંચામાં ₹743.80ને સ્પર્શ્યો હતો. NSE પર શેર 129 ટકા વધીને ₹733ના મથાળે બંધ રહ્યો હતો. LKP સિક્યોરિટીઝના રિસર્ચ હેડ એસ રંગનાથને જણાવ્યું હતું કે, “IRCTCના લિસ્ટિંગે ફરી એક વખત પુરવાર કર્યું છે કે વૃદ્ધિની પ્રબળ શક્યતા ધરાવતા ઉચ્ચ ગુણવત્તાવાળા બિઝનેસ અને IPOનો વાજબી ભાવ સફળતાની ગેરંટી છે. IRCTCએ એવન્યૂ સુપરમાર્ટનું પુનરાવર્તન કર્યું છે. એવન્યૂ સુપરમાર્ટના IPOમાં પહેલા જ દિવસે બમણા ભાવે લિસ્ટિંગ છતાં રોકાણકારોએ શેર ખરીદ્યા હતા.”

IRCTCના શેરમાં BSE પર 54.40 લાખ અને NSE પર 4.52 કરોડ શેર્સનું વોલ્યુમ થયું હતું. BSE પર IRCTCનું માર્કેટ-કેપ ₹11,657.60 કરોડે પહોંચ્યું હતું. લિસ્ટિંગના દિવસે 100 ટકાથી વધારે ‌વળતર સાથે IRCTCએ 2017માં એવન્યૂ સુપરમાર્ટના પ્રથમ દિવસના 102 ટકાના વળતરને વટાવી દીધું છે.

એપિક રિસર્ચના સીઇઓ મુસ્તફા નદીમે જણાવ્યું હતું કે, “એક જ દિવસમાં 120 ટકાનું ‌વળતર ધમાકેદાર કહી શકાય. છેલ્લાં કેટલાંક વર્ષોના IPOsમાં કદાચ આ સૌથી વધુ વળતર છે.”

રોકાણકારોએ IRCTCના IPOને જોરદાર પ્રતિસાદ આપ્યો હતો. ઇશ્યૂ 111.91 ગણો ભરાયો હતો. ઉલ્લેખનીય છે કે, ₹645 કરોડનો IPO શેર દીઠ ₹315-320ના ભાવે ઓફર કરાયો હતો. ભારતીય રેલવેએ રેલવેમાં કેટરિંગ સર્વિસિસ, ઓનલાઇન ટિકિટ વેચાણ અને રેલવે સ્ટેશન્સ પર પેકેજ્ડ ડ્રિંકિંગ વોટર પૂરી પાડવાની મંજૂરી માત્ર IRCTCને આપી છે.