એરટેલની જાહેરાતો ગેરમાર્ગે દોરનારી છે: રિલાયન્સ જીઓ

નવી દિલ્હી: સુનિલ ભારતી મિત્તલની ભારતી એરટેલ તેના જ ગ્રાહકોને ગેરમાર્ગે દોરનારી ઓફર્સ કરીને તેમજ સમાન પ્રકારના પ્લાન ખરીદનારા ગ્રાહકોને અલગ અલગ ઓફર કરીને ટેરિફના નિયમોનો ભંગ કરે છે એવો આરોપ રિલાયન્સ જીઓ ઇન્ફોકોમે લગાવ્યો છે.

મુકેશ અંબાણીની રિલાયન્સ જીઓની માંગણી છે કે, એરટેલ તેના બે પ્લાન્સ (રૂ.293 અને રૂ.44) ગેરમાર્ગે દોરીને વેચી રહી છે, જેથી ટેલિકોમ નિયમનકાર દ્વારા કંપનીને સર્વોચ્ચ દંડ ફટકારવામાં આવે.

આ પ્લાન્સ માટેની એરટેલની જાહેરાતો ગ્રાહકોને એવું માનવા માટે પ્રેરિત કરે છે કે, તેમને 70 દિવસ માટે પ્રતિ દિન 1 GB ડેટા મળશે. જે ગ્રાહકો એરટેલના ડ્યુઅલ ક્રાઇટેરિયાથી સંતુષ્ટ નથી થતા તેમને કંપની પ્રતિ દિન 50 MB ડેટા આપે છે અને ત્યાર બાદ પ્રત્યેક GB માટે રૂ.4,000 જેટલા અતિ ઊંચા ડેટા ટેરિફ પ્રમાણે ચાર્જ વસૂલે છે.

એરટેલ તેના આ પ્લાન્સ હેઠળ, 4G હેન્ડસેટ અને 4G SIM ધરાવતા ગ્રાહકને 70 દિવસ માટે પ્રતિ દિન 1 GB મોબાઇલ ઇન્ટરનેટ તેમજ અનલિમિટેડ લોકલ અને STD કોલ્સની ઓફર કરે છે. રૂ.293ના પ્લાનમાં અનલિમિટેડ કોલિંગ માત્ર એરટેલના નેટવર્ક પૂરતું મર્યાદિત છે. પણ જો 4G હેન્ડસેટ ન હોય અને આ પ્લાન્સ ખરીદ્યો હોય તેવા એરટેલના અન્ય ગ્રાહકને 35 દિવસ માટે પ્રતિ દિન માત્ર 50 MB ડેટા મળે છે.

જીઓની દલીલ છે કે, એરટેલ માત્ર 4G હેન્ડસેટ અને 4G SIM કાર્ડ ધરાવતા હોય તેવા નવા ગ્રાહકને જ 70 દિવસ માટે ૧ GB ડેટાનો હેડલાઇન લાભ આપીને ગ્રાહકોની વચ્ચે જ જૂથવાદ પેદા કરે છે, કારણ કે, તે અન્ય તમામ ગ્રાહકને 50 દિવસ માટે 35 MB જેટલો ધરખમ ઓછો ડેટા આપે છે, તેમજ વોઇસ કોલિંગનો લાભ પણ મર્યાદિત કરી દે છે.