જેટલીએ ટેક્સટાઇલ કંપનીઓની 5% GST દૂર કરવાની વિનંતી ફગાવી

નવી દિલ્હી: કાપડ પર સરકારે નાખેલા પાંચ ટકા GSTને દૂર કરવાની ટેક્સટાઇલ ઉદ્યોગની માંગણીને સરકારે ફગાવી દીધી છે. રાજ્યસભામાં એક સવાલના લેખિત જવાબમાં નાણામંત્રી અરુણ જેટલીએ જણાવ્યું હતું કે, ટેક્સટાઇલ ટ્રેડર્સની મુખ્ય માંગણી કાપડ પર કોઈ ટેક્સ નહીં લાદવાની છે અને તેને સ્વીકારી શકાય એમ નથી. આ ટેક્સના વિરોધમાં ગુજરાતમાં જબરજસ્ત વિરોધ થઈ રહ્યો છે અને સુરત તથા અમદાવાદના વેપારીઓ હડતાલ પર છે.

સરકારે જણાવ્યું હતું કે, કાપડ પર ઝીરો GSTથી ઈનપુટ ટેક્સ ક્રેડિટની ચેઇન તૂટી જશે અને પરિણામે, પાછળના તબક્કાઓમાં ગાર્મેન્ટના ઉત્પાદકોને ટેક્સ ક્રેડિટ નહીં મળે.
ઉપરાંત, આયાતી કાપડ પર ઝીરો રેટિંગ લાગશે, જ્યારે સ્થાનિક કાપડે તો ઈનપુટ ટેક્સનો સામનો કરવાનો જ રહેશે. પરિણામે, આયાત સામે સ્થાનિક ઉદ્યોગની સ્પર્ધાત્મકતા
ઘટશે.

જેટલીએ પાંચ ટકા GST શા માટે દૂર ના થઈ શકે તેનું કારણ સમજાવતાં કહ્યું હતું કે, GST પહેલાં જે ટેક્સ લાગતો હતો તેના કરતાં તો આ ટેક્સ ઓછો અથવા લગભગ સમાન છે. આથી, કાપડના ભાવ વધવાની શક્યતા નથી. આ સેક્ટર પર ક્યારેય ટેક્સ લાગતો નહોતો તેવું કહેવું યોગ્ય નથી. વાસ્તવમાં તો, 2003-04માં સમગ્ર ટેક્સટાઇલ ઉદ્યોગે સેન્ટ્રલ એક્સાઇઝ ડ્યૂટી ભરવી પડતી હતી.