અનંદિતા સિંહ મનકોટિયા, નવી દિલ્હી રિલાયન્સ Jio સાથે હરીફાઈ વધતા દેશની સૌથી મોટી ટેલિકોમ કંપની એરટેલ હવે રોમિંગ ચાર્જીસ હટાવી દેવાનો વિચાર કરી રહી છે. આ સમગ્ર મામલા સાથે જોડાયેલા સૂત્રના જણાવ્યા મુજબ કંપની પોતાના નેટવર્ક પર વોઈસ અને ડેટા સર્વિસ પર રોમિંગ ચાર્જ હટાવી શકે છે. રિલાયન્સ જિયોની એન્ટ્રી પછી ભારતના ટેલિકોમ સેક્ટરમાં પ્રાઈઝ વોર છેડાઈ ગયુ છે. એરટેલના નજીકના સૂત્રોએ ઇકોનોમિક ટાઈમ્સે જણાવ્યું, “કંપની હવે ઇનકમિંગ કોલ્સ અને મેસેજ પર રોમિંગ ચાર્જીસ સંપૂર્ણ રીતે હટાવી દેવાનો વિચાર કરી રહી છે. આ ઉપરાંત આઉટગોઈંગ કોલ્સ પર પણ પ્રિમિયમ ચાર્જ દૂર કરવાનો વિચાર કરી રહી છે.” આ ઉપરાંત નેશનલ રોમિંગ પર એડિશનલ ડેટા ચાર્જ પણ લાગુ નહિ પડે. આટલુ જ નહિં, કંપની વિદેશમાં ટ્રાવેલ કરનારા લોકોને એક્ટિવેશન અને બિલિંગની પ્રક્રિયાને પણ આસાન બનાવી દેશે. કંપનીનું માનવુ છે કે આ કારણે ફોરેન ટ્રાવેલ કરનારા લોકોમાં એરટેલના રોમિંગ પેકનો વપરાશ વધશે. જો કે એરટેલે હાલમાં આ અંગે કોઈપણ કોમેન્ટ કરવાનુ ટાળ્યુ હતુ. આ પગલાથી હાલમાં 26 કરોડ 80 લાખ સબસ્ક્રાઈબર ધરાવતા એરટેલને મોટા પ્લાન વેચવામાં મદદ મળશે. એરટેલ પછી વોડાફોન અને આઈડિયા પણ રોમિંગ ચાર્જ રદ કરી દે તેવી શક્યતા છે. રિલાયન્સ Jioની ફ્રિ રોમિંગ, ફ્રી વોઈસ કોલ અને ડેટા ઓફર્સના પડકારોને પહોંચી વળવા આઈડિયા અને વોડાફોનના ભારતીય યૂનિટ એક થઈને નવી કંપની બનાવે તેવી શક્યતા છે. ગયા વર્ષે ઓક્ટોબરમાં જ વોડાફોને ઇન્કમિંગ કોલ પર રોમિંગ ફ્રી કરી નાંખ્યુ હતુ. જો કે આઉટ ગોઈંગ કોલ્સ અને ડેટા યૂઝ પર હજુ પણ રોમિંગ ચાર્જ લાગી રહ્યો છે. માનવામાં આવે છે કે એરટેલના આ પગલાથી તેના રેવન્યુ શેરમાં 3થી 4.5 ટકા સુધીનો ઘટાડો થશે. જો કે રિલાયન્સ Jioના આગમન પછી આ કંપનીઓ પાસે બીજા ખાસ ઓપ્શન પણ ખુલ્લા નથી રહ્યા.
Jioને ટક્કર આપવા રોમિંગ ફ્રી કરી દેશે એરટેલ
I am Gujarat 27 Feb 2017, 10:51 am