જૂનમાં CPI 1.54%, IIP વૃદ્ધિ ધીમી પડી: રેટકટની શક્યતા વધી

નવી દિલ્હી:અર્થતંત્ર માટે મહત્ત્વના બે આંકડા મિશ્ર રહ્યા છે. રિટેલ ફુગાવો (CPI) જૂન મહિનામાં 1.54 ટકાની નવી નીચી સપાટીએ પહોંચ્યો છે, જે પ્રોત્સાહક કહી શકાય. જોકે, મે મહિનામાં ઔદ્યોગિક ઉત્પાદનની વૃદ્ધિ ધીમી પડી છે અને IIP ઘટીને 1.7 ટકાના સ્તરે સરક્યો છે.

શાકભાજી, કઠોળ અને દૂધની પેદાશોના ભાવમાં ઘટાડાને કારણે રિટેલ ફુગાવો (CPI) 1.54 ટકા થયો છે, જે આવતા મહિનાની ધિરાણનીતિમાં રિઝર્વ બેન્કને વ્યાજદર ઘટાડવાની ફરજ પાડી શકે. મુખ્ય આર્થિક સલાહકાર અરવિંદ સુબ્રમણિયને જણાવ્યું હતું કે, 1.54 ટકાનો આંક ઘણો નીચો છે અને મેક્રો ઇકોનોમિક સ્થિરતામાં મજબૂત કોન્સોલિડેશન દર્શાવે છે.

અગાઉ 1999 અને એ પહેલાં 1978માં આટલો નીચો ફુગાવો જોવા મળ્યો હતો.ઉલ્લેખનીય છે કે, CPIની લેટેસ્ટ સિરીઝ જાન્યુઆરી 2012માં લોન્ચ કરવામાં આવી હતી. મે મહિનામાં ફુગાવો 2.18 ટકા હતો, જ્યારે જૂન 2016માં 5.77 ટકા હતો.

સેન્ટ્રલ સ્ટેટિસ્ટિક્સ ઓફિસના આંકડા પ્રમાણે ખાદ્યાન્ન ફુગાવો ઘટીને 2.12 ટકા થયો છે, જે મે મહિનામાં -1.05 ટકા હતો. શાકભાજીનો ફુગાવો ઘટીને 16.53 ટકા તેમજ કઠોળ અને તેની પ્રોડક્ટ્સનો ફુગાવો ઘટીને 21.92 ટકા થયો હતો. ઈંધણ અને લાઇટ સેગમેન્ટનો ફુગાવો ઘટીને 4.54 ટકા થયો છે, જે મે મહિનામાં 5.46 ટકા હતો. ઉલ્લેખનીય છે કે, RBI ધિરાણનીતિના નિર્ણયમાં CPIને ધ્યાનમાં લે છે. આગામી પોલિસી ઓગસ્ટમાં છે. જૂનમાં રિઝર્વ બેન્કે વ્યાજદરમાં કોઈ ફેરફાર કર્યો ન હતો.

ઔદ્યોગિક ઉત્પાદનની વૃદ્ધિ ધીમી રહી છે. મે મહિનામાં IIP વૃદ્ધિ ઘટીને 1.7 ટકા રહી છે, જે અગાઉના વર્ષના સમાન ગાળામાં 8 ટકા હતી. માઇનિંગ અને મેન્યુફેક્ચરિંગ સેક્ટરની નબળી કામગીરીને લીધે RBI પર વ્યાજદર ઘટાડવાનું દબાણ વધશે.

એપ્રિલ-મેના ગાળામાં IIP ઘટીને 2.3 ટકા રહ્યો છે, જે અગાઉના વર્ષના સમાન ગાળામાં 7.3 ટકા હતો. રોકાણનો મહત્ત્વનો સંકેત ગણાતા કેપિટલ ગૂડ્ઝ સેગમેન્ટનો વૃદ્ધિદર ઘટીને 3.9 ટકા થયો છે, જે મે 2016માં 13.9 ટકા હતો. કન્ઝ્યુ. ડ્યુરેબલ્સ સેગમેન્ટમાં પણ ઘટાડો નોંધાયો હતો.

મે મહિનામાં માઇનિંગ સેક્ટરનું ઉત્પાદન ગયા વર્ષના સમાન ગાળાની 5.7 ટકાની વૃદ્ધિ સામે 0.9 ટકા ઘટ્યું છે. મેન્યુફેક્ચરિંગ સેક્ટરની વૃદ્ધિ અગાઉના 8.6 ટકાની તુલનામાં 1.2 ટકા રહી છે. જોકે, વીજ ઉત્પાદન 8.7 ટકા વધ્યું છે, જે અગાઉના વર્ષના સમાન ગાળામાં 6.1 ટકા હતું. ઉલ્લેખનીય છે કે, સરકાર ખાનગી રોકાણને પ્રોત્સાહન આપવા RBIને વ્યાજદરમાં ઘટાડો કરવાનું જણાવી રહી છે. ઉદ્યોગજગત પણ રેટ કટની તરફેણમાં છે.