સ્ટાર બેટ્સમેન જ નહિ, સ્ટાર બિઝનેસમેન પણ છે વિરાટ

ઈશાની દત્તાગુપ્તાઃ ક્રિકેટની સાથે સાથે દિગ્ગજ ભારતીય બેટ્સમેન વિરાટ કોહલી માર્કેટિંગની દુનિયામાં પણ મોટો સ્ટાર બની ગયો છે. એડિડાસ, ઓડીથી લઈને પેપ્સી સુધી તે લગભગ 15 બ્રાન્ડની એડ કરી રહ્યો છે. 2015માં તેણે જાહેરાતોમાંથી જ 100 કરોડ રૂપિયાથી વધુની કમાણી કરી હતી. આ પહેલાં સચિન તેંડુલકર અને મહેન્દ્રસિંહ ધોની પણ આ રેકોર્ડ સુધી પહોંચી ચૂક્યા છે, પરંતુ વિરાટ કોહલી ક્રિકેટની બહાર ફક્ત એડવર્ટાઇઝની પીચ પર જ વ્યસ્ત નથી, તેણે હવે બિઝનેસની દુનિયામાં પણ પગ મૂક્યો છે.

વિરાટ ઘણી ટીમ અને રમતો સાથે સંકળાયેલા બિઝનેસમાં કો-ઓનર છે. વિરાટનો સૌથી મહત્ત્વાકાંક્ષી બિઝનેસ પ્રોજેક્ટ ફિટનેસ ચેન ચિસેલ છે. તેને આશા છે કે, 2018 સુધી તેના વિશ્વભરમાં 100 સેન્ટર હશે. સિંગાપોરની પ્રિવિપ્લેક્સે કોહલીની સાથે તેના સબસ્ક્રિપ્શન બેસ્ડ ફેન ક્લબના લોન્ચિંગ માટે પાર્ટનરશિપ કરી છે. કોહલી જે વ્યવસાય સાથે જોડાયેલો છે, તેમાં એક જિમ ચેન, ક્લોથિંગ લાઇન, ઇન્ટરનેશનલ પ્રીમિયર ટેનિસ લીગની દુબઈ ટીમ, ઇન્ડિયન સુપર લીગની ગોવા ફ્રેન્ચાઇઝી, જેએસડબ્લ્યુનો માલિકી હક ધરાવતી કુસ્તી લીગ ટીમ, લંડનની સ્પેશિયલ મીડિયા સ્ટાર્ટઅપ અને સિંગોપુરની સ્ટાર્ટઅપનો સમાવેશ થાય છે.

આક્રમક બેટિંગ માટે જાણીતા વિરાટ કોહલીએ થોડા દિવસ પહેલાં જ ઇટી મેગેઝિનને કહ્યું હતું કે, ‘હું મારા સ્વભાવને અનુકૂળ હોય તેની સાથે જ જોડાવું છું. બિઝનેસમેન તરીકે હું એ વાતનું ધ્યાન રાખું છું. જો કોઈ કામમાં રુચિ જ ન હોય તો તમે તે કામની શરૂઆત જ કરી શકતા નથી. મારાં એડવર્ટાઇઝિંગ અને બિઝનેસ વેન્ચર્સ એવાં હોવાં જોઈએ કે જે ભવિષ્યમાં લોકોને મદદ કરી શકે.’

ડબ્લ્યુપીપીની મીડિયા ઇનવેસ્ટમેન્ટ યુનિટના સ્પોર્ટ્સ એન્ડ એન્ટરટેનમેન્ટ બ્રાંચ ઈએસપી પ્રોપર્ટીઝના બિઝનેસ હેડ વિનીત કાર્ણિક કહે છે કે, ‘વિરાટ કોહલી પોતે એક બ્રાન્ડ છે. વિશ્વભરમાં જાણીતા ખેલાડીઓએ પોતે પોતાનાં લેબલ લોન્ચ કર્યાં છે. કોહલી પણ આ ટ્રેન્ડને અનુસરી રહ્યો છે.’