ઓગસ્ટમાં ફુગાવો 11 માસના તળિયે: CPI 3.69, IIP વધીને 6.6%

65792335 નવી દિલ્હી:અર્થતંત્ર માટે સાનુકૂળ સમાચાર સાથે રિટેલ ફુગાવો 11 મહિનાની નીચી સપાટીએ પહોંચ્યો છે. તેની સાથે જુલાઈમાં ઔદ્યોગિક ઉત્પાદનમાં 6.6 ટકા વધારો નોંધાયો છે. બુધવારે જાહેર થયેલા ડેટા મુજબ ઓગસ્ટમાં રિટેલ ફુગાવો (CPI) 3.69 ટકા રહ્યો છે, જે જુલાઈમાં 4.17 ટકા અને ઓગસ્ટ 2017માં 3.28 ટકા હતો.

રિઝર્વ બેન્કની ધિરાણનીતિ પાંચ ઓક્ટોબરે જાહેર થવાની છે ત્યારે વ્યાજદરમાં ફેરફારના નિર્ણય પર રૂપિયાના ઘટાડા અને CPIના આંકને ધ્યાનમાં લેવાશે. ઉલ્લેખનીય છે કે, રિઝર્વ બેન્ક રિટેલ ફુગાવો 4 ટકા નીચે રાખવાનો લક્ષ્યાંક ધરાવે છે.

અન્ય આર્થિક ડેટામાં જુલાઈ મહિનામાં ઔદ્યોગિક ઉત્પાદન (IIP) 6.6 ટકા વધ્યું છે. મેન્યુફેક્ચરિંગ સેક્ટરની સારી કામગીરી તેમજ કેપિટલ ગૂડ્ઝ અને કન્ઝ્યુ ડ્યુરેબલ્સના સારા વેચાણને પગલે IIPમાં સુધારો નોંધાયો છે. જોકે, જૂનના 6.8 ટકાના અંદાજની તુલનામાં IIPમાં ઘટાડો નોંધાયો છે. IIP વૃદ્ધિનો આંકડો અગાઉના 7 ટકાથી ઘટાડી 6.8 ટકા કરવામાં આવ્યો છે.

જુલાઈમાં મેન્યુફેક્ચરિંગ સેક્ટરે 7 ટકા વૃદ્ધિ દર્શાવી છે, જે અગાઉના મહિને 0.1 ટકાનો ઘટાડો હતો. જુલાઈમાં કન્ઝ્યુ ડ્યુરેબલ્સે 14.4 ટકાની પ્રોત્સાહક વૃદ્ધિ દર્શાવી છે, જે અગાઉના વર્ષના સમાન ગાળામાં 2.4 ટકાનો ઘટાડો હતો. કેપિટલ ગૂડ્ઝનું ઉત્પાદન અગાઉના વર્ષના સમાન ગાળાના 1.1 ટકાના ઘટાડા સામે 3 ટકા વધ્યું છે. એપ્રિલ-જુલાઈમાં IIP વૃદ્ધિ 5.4 ટકા રહી છે, જે અગાઉના વર્ષના સમાન ગાળામાં1.7 ટકા હતી.
]]>