L&Tનો ચોખ્ખો નફો 13 ટકા વધ્યો

71732902 મુંબઇ:લાર્સન એન્ડ ટુબ્રોએ 2019-20નાં બીજા ક્વાર્ટરમાં કોન્સોલિડેટેડ વેચાણ, નફો અને ઓર્ડર ઇન્ફ્લોમાં મજબૂત વૃદ્ધિ નોંધાવી છે. પરિણામને મેનેજમેન્ટે આર્થિક સ્થિતિ પડકારજનક હોવા છતાં વિપરિત સ્થિતિમાં મજબૂત કામગીરી ગણાવી હતી.

કોન્સોલિડેટેડ ચોખ્ખો નફો અગાઉના વર્ષના સમાન ગાળા કરતાં 13.3 ટકા વધીને ₹2527 કરોડ થયો હતો. વેચાણ 15 ટકા વધીને ₹35328 કરોડ થયો હતો. કંપની આંતરરાષ્ટ્રીય માર્કેટમાં મજબૂત ઓર્ડર ઇનફ્લોને કારણે સ્થાનિક ઓર્ડર્સમાં નરમાઇને ભરપાઇ કરી શકી હતી.

કંપનીએ તાજેતરમાં ખરીદેલી માઇન્ડટ્રીના નાણાંકીય પરિણામોને પણ સમાવી લીધા હતા. સીઇઓ અને એમડી એસ એન સુબ્રમણ્યમે જણાવ્યું હતું કે, “અર્ધવાર્ષિક ધોરણે અમે ટ્રેક પર હોવાથી અમે સદનસીબ છીએ. અમને જે ઓર્ડર મળવાની ધારણા હતી તેમાં લાંબો સમય લાગતાં બીજા ક્વાર્ટરમાં અમે સંઘર્ષ કર્યો હતો.”

કંપનીએ ₹48,292 કરોડનાં નવા ઓર્ડર્સ મેળવ્યા હતા, જે વાર્ષિક ધોરણે 20 ટકા વધુ છે. પ્રથમ છ મહિનામાં કરેલી કામગીરીને આધારે મેનેજમેન્ટે ઓર્ડર ઇન્ફ્લોમાં 10થી 12 ટકા અને આવકમાં 12થી 15 ટકાનો વધારો થવાનો અંદાજ જાળવી રાખ્યો છે. કંપનીની ઓર્ડર બુક ₹303222 કરોડ હતી. કુલ આવકમાં વિદેશની કામગીરીનો હિસ્સો એક ટકા વધીને 34 ટકા થયો હતો.

બીએસઇ પર કંપનીનો શેર 0.76 ટકા ઘટીને ₹1430.95એ બંધ રહ્યો હતો.