મુહૂર્ત ટ્રેડિંગમાં શેરબજારનો મોટો કૂદકો, સેન્સેક્સ ઓલટાઈમ હાઈ પર પહોંચ્યો

મુહૂર્ત ટ્રેડિંગમાં શનિવારે સેન્સેક્સે ઓલ ટાઈમ હાઈનો નવો રેકોર્ડ નોંધાવ્યો છે અને 194 પોઈન્ટની તેજી સાથે 43,637 પર બંધ રહ્યો હતો. નિફ્ટી 50 પોઈન્ટ સાથે 12770ના સ્તર પર બંધ રહ્યો હતો. એક કલાકના વિશેષ ટ્રેડિંગ દરમિયાન સેન્સેક્સ 43830ના અત્યાર સુધીના સૌથી ઊંચા સ્તરે અને નિફ્ટી 12828ના સ્તરે પહોંચ્યો હતો.

સેન્સેક્સના 30 શેરોમાંથી 26 શેર ઉછાળા સાથે બંધ થયા હા. તેમાં ભારતી એરટેલ, ટાટા સ્ટીલ, સનફાર્મા, બજાજ ફાઈનાન્સિયલ સર્વિસિસ અને આઈટીસીના શેર ટોપ ગેનર રહ્યા હતા. નિફ્ટી પર બીપીસીએલ, આઈઓસી, ટાટા મોટર્સ અને એચડીએફસી લાઈફના શેર ટોપ ગેનર રહ્યા હતા.
મુહૂર્ત ટ્રેડિંગ સાથે જ હિન્દી કેલેન્ડર વર્ષ સંવત 2077ની શરૂઆત થઈ ગઈ છે. સંવત 2076મા સેન્સેક્સે અંદાજીત 11 ટકા રિટર્ન આપ્યું હતું. મુહૂર્ત ટ્રેડિંગમાં સેન્સેક્સ 372 પોઈન્ટની તેજી સાથે 43815ના સ્તરે ખુલ્યો હતો. મુંબઈનું બોમ્બે સ્ટોક એક્સચેન્જમાં મુહૂર્ત ટ્રેડિંગનું ઉદ્દઘાટન બોલીવૂડ સ્ટાર આથિયા શેટ્ટીએ કર્યું હતું.