ચાઈનીઝ મોબાઈલ કંપનીઓને હંફાવવા સ્વદેશી Micromaxએ બનાવ્યો પ્લાન

નવી દિલ્હી: મેડ ઈન ઈન્ડિયા ગેજેટ્સની બોલબાલા વધી રહી છે, ત્યારે Micromax ફરી માર્કેટમાં આવવા માટે તૈયારી કરી રહી છે. કંપનીએ પોતાના વિસ્તરણ માટે 500 કરોડ રુપિયા રોકવાની જાહેરાત કરી છે, તેમજ રિસર્ચ એન્ડ ડેવલપમેન્ટ પર પણ કંપની મોટું રોકાણ કરવા જઈ રહી છે. કંપનીના સહ-સંસ્થાપક રાહુલ શર્માએ અમારા સાથી અખબાર ઈકોનોમિક ટાઈમ્સને જણાવ્યું હતું કે સરકારે હાલમાં કરેલી જાહેરાતો માઈક્રોમેક્સને ચાઈનીઝ કંપનીઓને હરિફાઈ આપવામાં મદદ કરશે.

2014નો સમયગાળો માઈક્રોમેક્સ માટે ગોલ્ડન ટાઈમ હતો. તે વખતે કંપની દેશમાં બીજી સૌથી મોટી સ્માર્ટફોન બનાવતી બ્રાન્ડ હતી. હાલ દેશના 70 ટકા સ્માર્ટફોન માર્કેટ પર ચાઈનીઝ કંપનીઓનો કબજો છે. 2016થી ચાઈનીઝ કંપનીઓએ ભારત પર પોતાનું પ્રભુત્વ જમાવવાનું શરુ કર્યું હતું, જેમને હરિફાઈ આપવામાં ઉણી ઉતરેલી માઈક્રોમેક્સ જેવી બ્રાંડ ચાઈનીઝ પ્રતિસ્પર્ધીઓ સામે ટકી ના શકતા માર્કેટમાંથી ફેંકાઈ ગઈ હતી.

આ પણ વાંચો: નવો 'મેડ ઈન ઈન્ડિયા' સ્માર્ટફોન લોન્ચ, પ્રાઈઝ ₹6000થી પણ ઓછી

ભારત સરકારે સ્થાનિક ઉત્પાદકો માટે પ્રોડક્શન લિંક્ડ ઈન્સેન્ટિવ સ્કીમ શરુ કરી છે, જેમાં સરકાર 6 ટકા જેટલું ઈન્સેન્ટિવ આપશે. માઈક્રોમેક્સનું માનવું છે કે આ પ્રોત્સાહન ખૂબ જ મોટું છે, અને તેનાથી કંપની ચાઈનીઝ હરિફોને ટક્કર આપવા સક્ષમ બનશે. ઉલ્લેખનીય છે કે, ચાઈનીઝ કંપનીઓ ઓછી કિંમતના સ્માર્ટફોનમાં પણ સારા ફીચર્સ આપતી હોવાના કારણે ગ્રાહકો તેમને પહેલી પ્રાયોરિટી આપે છે. માઈક્રોમેક્સ પણ સસ્તામાં સોલિડ ફીચર ધરાવતા ફોન ઉતારી ચાઈનીઝ કંપનીઓને હંફાવવા માગે છે.

માઈક્રોમેક્સના કો-ફાઉન્ડર રાહુલ શર્માએ ડેટા લોકલાઈઝેશન પર પણ ભાર મૂકતા જણાવ્યું હતું કે વિદેશી કંપનીઓને ભારતમાં ડેટા સ્ટોર કરવાની ફરજ પાડવાથી કંઈ નહીં થાય. તેઓ આ ડેટાના ઉપયોગથી આર્ટિફિશિયલ ઈન્ટેલિજન્સને વધુ સક્ષમ બનાવી શકે છે.