ચીનના વધતા પ્રભાવને રોકવા અદાણી દેશમાં પ્રથમ ટ્રાન્સશિપમેન્ટ પોર્ટ સ્થાપશે

દેશમાં પ્રથમ ટ્રાન્સશિપમેન્ટ પોર્ટ સ્થાપવાની ૨૫ વર્ષ અગાઉની યોજના હવે સાકાર થવા જઈ રહી છે. દક્ષિણ એશિયામાં ચીનના વધતાં પ્રભાવને ખાળવા માટે ભારત સરકારે આ પોર્ટની નજીક ~ ૨૭,૦૦૦ કરોડના ખર્ચે શિપિંગ હબ બનાવવાનો પણ નિર્ણય કર્યો છે. આ મેગા પ્રોજેક્ટ માટે ઉદ્યોગપતિ ગૌતમ અદાણીને સરકાર વાયેબિલિટી ગેપ પૂરવા માટે ૧૬ અબજ ડોલરનું ભંડોળ પણ ઉપલબ્ધ બનાવશે. આ પોર્ટ કેરળના વિંઝિજામ ખાતે આકાર લઈ રહ્યું છે.

શિપિંગ મંત્રાલયના એક અધિકારીના જણાવ્યાં અનુસાર વિઝિંજામ પોર્ટ કાર્યરત થયા બાદ કેન્દ્ર સરકાર તમિળનાડુમાં ઈનાયમમાં પોર્ટ બનાવવાની કામગીરી શરૂ કરશે. આ પોર્ટ કાર્યરત થવાથી ભારતીય કંપનીઓને વર્ષે આશરે ૨૦ કરોડ ડોલરની બચત થશે, આ પોર્ટ્સ ફ્રેઈટને મોટા શિપમાં ટ્રાન્સફર કરવામાં પણ ઉપયોગી થઈ પડશે. હાલમાં આ પ્રકારના ફ્રેઈટના મોટા કામકાજ શ્રીલંકા, દુબઈ તથા સિંગાપોરના પોર્ટ્સમાં જ થાય છે. મોદી સરકાર કાર્ગો ટ્રાફિકને ૨૦૨૧ સુધીમાં ત્રણ ગણો વધારવની યોજના ધરાવે છે. આ યોજનાથી એક લાભ એ પણ થશે કે ભારત દક્ષિણ એશિયામાં ચીનના વધતાં પ્રભાવને પણ ખાળી શકશે. વિંઝિજામ પોર્ટ ૨૦૧૮ સુધીમાં કાર્યરત થવાની શક્યતા છે. અદાણી જૂથ તેને ૧ અબજ ડોલરના ખર્ચે વિકસાવી રહ્યું છે. દક્ષિણ એશિયામાં ચીનના વધતાં પ્રભાવથી ભારત મુશ્કેલી અનુભવી રહ્યું છે. બીજી બાજુ ચીને પોર્ટ નિર્માણ માટે શ્રીલંકા, બાંગ્લાદેશ તથા માલદિવમાં રોકાણ કર્યું છે. આ ઉપરાંત પાકિસ્તાનમાં પણ મોટા પાયે પગપેસારો કર્યો છે.