પ્રાકૃતિક ગેસના ભાવ વધ્યા, CNG થશે મોંઘો?

નવી દિલ્હી: ઘરમાં રસોઈ માટે અને ટ્રાન્સપોર્ટેશનમાં ઉપયોગ માટે પાઈપથી આવતો ગેસ મોંઘી થવા જઈ રહી છે. સરકારે શુક્રવારે ઘરેલુ પ્રાકૃતિક ગેસના ભાવ 10 ટકા વધારવાની જાહેરાત કરી છે. વધેલી કિંમત 1 ઓક્ટોબરથી લાગુ થશે. સરકારના આ પગલાંથી સીએનજીના ભાવ વધી શકે છે અને વિજળી તેમજ યુરિયા ઉત્પાદનની પડતર પણ વધશે. પેટ્રોલિયમ મંત્રાલયના પેટ્રોલિયમ યોજના તેમજ વિશ્લેષણ સેલ મુજબ, પ્રાકૃતિક ગેસના મોટાભાગના સ્થાનિક ઉત્પાદકોને અપાતી કિંમત વર્તમાન 3.06 ડોલર પ્રતિ 10 લાખ બ્રિટિશ થર્મલ યુનિટ (એમએમબીટીયુ)થી વધારીને 3.36 ડોલર પ્રતિ એમએમબીટીયુ કરી દેવાઈ છે. પ્રાકૃતિક ગેસની કિંમત ગેસનો ભંડાર ધરાવતા દેશો જેવાકે અમેરિકા, રશિયા અને કેનેડાના સરેરાશ દરોના આધાર દર છ મહિને બદલવામાં આવે છે. ભારત અડધાથી વધુ ગેસની આયાત કરે છે, જેની પડતર સ્થાનિક દરથી બેગણી વધારે હોય છે. ફેરફાર કરાયેલા દર 1 ઓક્ટોબરથી આવતા છ મહિના માટે પ્રભાવી રહેશે. આ કિંમત ઓક્ટોબર 2015થી માર્ચ 2016ના ગાળા દરમિયાન 3.82 ડોલર પ્રતિ એમએમબીટીયુ બાદ સૌથી વધુ હશે. કિંમત વૃદ્ધિથી ઓએનજીસી અને રિલાયન્સ ઈન્ડસ્ટ્રીઝ જેવી ઉત્પાદક કંપનીઓની કમાણી વધશે, પરંતુ સીએનજીની કિંમતોમાં વધારાની સાથે જ યુરિયા તેમજ વિજળી ઉત્પાદનની પડતર પણ વધશે. આ લગભગ 3 વર્ષમાં કરાયેલો બીજો વધારો છે. સૂત્રોનું કહેવું છે કે, પ્રાકૃતિક ગેસની કિંમતમાં જો એક ડોલરનો વધારો થાય છે તો ઓએનજીસીની આવક વાર્ષિક આધાર પર ચાર હજાર કરોડ રૂપિયા વધી જાય છે.