નવી માર્બલ આયાત નીતમાં લાયસન્સ રાજ ખતમ કરાયાનો દાવો

સ્થાનિક ગ્રાહકો, ઉત્પાદકો તથા પ્રોસેસર્સના હિતોનું રક્ષણ કરવા માટે સરકારે વિવિધ પ્રકારના માર્બલ પથ્થર તથા ટ્રેવર્ટાઈન બ્લોક્સની આયાતની નવી નીતિ જાહેર કરી છે. આ નવી નીતિ આગામી ૧ ઓક્ટોબરથી અમલી બનશે. આ અંગે ડિરેક્ટોરેટ જનરલ ઓફ ફોરેન ટ્રેડ(ડીજીએફટી) દ્વારા જારી કરાયેલા એક નિવેદનમાં જણાવ્યાં અનુસાર નવી નીતિમાં સ્થાનિક ગ્રાહકો, ઉત્પાદકો અને પ્રોસેસર્સના હિતોનું સંતુલન જાળવી માર્બલ તથા ટ્રેવર્ટાઈન બ્લોક્સની આયાતની જટિલ લાયસન્સિંગ પ્રક્રિયાનો અંત લવાયો છે.

માર્બલ તથા ટ્રેવર્ટાઈન બ્લોક્સની નવી નીતિમાં આયાત માટેના પરિમાણાત્મક નિયંત્રણો તથા નિયંત્રણકારી લાયસન્સિંગ સિસ્ટમને દૂર કરાઈ હોવાનો દાવો કરાયો છે. મિનિમમ ઈમ્પોર્ટ પ્રાઈસ(એમઆઈપી) સાથે જોડાયેલી વિસંગતતાના ઉકેલ માટે માર્બલ બ્લોક્સની ન્યૂનતમ આયાત કિંમત ઘટાડીને ટન દીઠ ૨૦૦ ડોલર કરાઈ છે. સ્થાનિક ઉત્પાદકોના હિતોની જાળવણી માટે માર્બલ તથા ટ્રેવર્ટાઈન બ્લોક્સની આયાત પરની બેઝિક કસ્ટમ ડ્યૂટી વર્તમાન ૧૦ ટકાથી ચાર ગણી વધીને આગામી ૧ ઓક્ટોબરથી ૪૦ ટકા થઈ જશે. આ ઉપરાંત માર્બલ સ્લેબ્સ પરની એમઆઈપી ઘટાડીને સ્ક્વેર મીટર દીઠ ૪૦ ડોલર કરવામાં આવી છે. માર્બલ સ્લેબ્સ પરની બેઝિક કસ્ટમ ડ્યૂટી આગામી ૧ ઓક્ટોબરથી વર્તમાન ૧૦ ટકાથી બમણી થઈ ૨૦ ટકા થઈ જશે. જ્યારે ગ્રેનાઈટ સ્લેબ્સની આયાત પરની એમઆઈપી ઘટાડીને સ્ક્વેર મીટર દીઠ ૫૦ ડોલર કરવામાં આવી છે. ગ્રેનાઈટ સ્લેબ્સની આયાત પરની બેઝિક કસ્ટમ ડ્યૂટી વર્તમાન ૧૦ ટકાથી બમણી કરીને ૨૦ ટકા કરાઈ હોવાનું ડીજીએફટીએ નિવેદનમાં જણાવ્યું છે.

નવી આયાત નીતિથી ઈજારાશાહીનો અંત આવશે
માર્બલના વેપારીઓ તથા એસોસિયેશને સરકાર દ્વારા જારી કરાયેલી નવી માર્બલ આયાત નીતિને આવકારી છે. દિલ્હી માર્બલ ડિલર્સ એસોસિયેશનના મતે વિવિધ પ્રકારના માર્બલ્સ તથા ટ્રેવર્ટાઈન બ્લોક્સની આયાત માટે જારી કરાયેલી નવી નીતિથી આ ક્ષેત્રે ઈજારાશાહી તથા નિયંત્રણકારી વેપારી રસમોનો અંત આવશે. આ ઉપરાંત તેનાથી ફેક્ટરીઝને પૂરતો કાચો માલ ઉપલબ્ધ બને તે સુનિશ્ચિત થશે. એસોસિયેશનના ચેરમેન પ્રવીણ ગોયલે આ નવી નીતિને કાચા માર્બલ બ્લોક્સની આયાતમાં અયોગ્ય અને અનૈતિક લાયસન્સ રાજનો અંત ગણાવતાં જણાવ્યું હતું કે આ પગલાંથી ઉદ્યોગના તમામ લોકોને સમાન તક સાંપડશે અને તેમને પોતાના બિસ્માર એકમો ફરીથી શરૂ કરવામાં મદદ મળશે, જેને પરિણામે રોજગારીનું સર્જન થશે.

નવી માર્બલ આયાત નીતિ ઉડતી નજરે
મિનિમમ ઈમ્પોર્ટ પ્રાઈસ(એમઆઈપી) સાથે જોડાયેલી વિસંગતતાઓ દૂર કરવા માટે માર્બલ બ્લોક્સની ન્યૂનતમ આયાત કિંમત ઘટાડીને ટન દીઠ ૨૦૦ ડોલર કરવામાં આવી છે. નવી નીતિમાં આયાત માટેના પરિમાણાત્મક નિયંત્રણો તથા નિયંત્રણકારી લાયસન્સિંગ પ્રથાને દૂર કરાઈ હોવાનો પણ દાવો કરાયો છે. સ્થાનિક ઉત્પાદકોના હિતોના સંરક્ષણ માટે માર્બલ તથા ટ્રેવર્ટાઈન બ્લોક્સની આયાત પરની બેઝિક કસ્ટમ ડ્યૂટી હાલના ૧૦ ટકાથી ચાર ગણી વધારીને આગામી ૧ ઓક્ટોબરથી ૪૦ ટકા કરાઈ છે. આ ઉપરાંત માર્બલ સ્લેબ્સ પરની એમઆઈપી ઘટાડીને સ્ક્વેર મીટર દીઠ ૪૦ ડોલર કરવામાં આવી છે.