Archean Chemical IPOમાં ગાજ્યા મેઘ વરસ્યા નહીં, જાણો કયા ભાવે શેરનું લિસ્ટિંગ થયું

Archean Chemical IPO listing: આર્કિયન કેમિકલ ઈન્ડસ્ટ્રીઝના શેરનું આજે BSE અને NSE પર લગભગ 11 ટકાના પ્રીમિયમે લિસ્ટિંગ થયું છે. 407 રૂપિયાની ઓફર પ્રાઈસની સામે બજારમાં આ શેર 450 રૂપિયા પર લિસ્ટ થયા છે. આ શેરમાં એક લોટની કિંમત 14,652 હતી. તેને ધ્યાનમાં રાખતા રોકાણકારોને લોટ દીઠ માત્ર 1548 રૂપિયાનો ફાયદો થયો છે. અગાઉ ગ્રે માર્કેટમાં જે પ્રીમિયમ ચાલતું હતું તેના પરથી રોકાણકારોને 35થી 40 ટકા નફો થવાની શક્યતા દેખાતી હતી, પરંતુ એવું થયું નથી. આર્કિયન કેમિકલના શેર B ગ્રૂપની સિક્યોરિટીમાં લિસ્ટ થયા છે. તેના કારણે આજે આ કંપનીના શેર માટે આજે સ્પેશિયલ પ્રિ-ઓપન સેશન (SPOS) રહ્યો હતો.

ગ્રે માર્કેટમાં 124 રૂપિયા પ્રીમિયમ હતું
આર્કિયન કેમિકલના આઈપીઓનું લિસ્ટિંગ થાય તે અગાઉ સોમવારે સવારે ગ્રે માર્કેટમાં 124 રૂપિયાનું પ્રીમિયમ ચાલતું હતું. આ શેર સ્ટોક એક્સચેન્જ પર 30થી 40 ટકા પ્રીમિયમે લિસ્ટ થશે તેવી અપેક્ષા હતી. ગયા શુક્રવારે આર્કિયન કેમિકલના શેરમાં 112 રૂપિયા ગ્રે માર્કેટ પ્રીમિયમ (GMP) ચાલતું હતું. કંપનીએ આ આઈપીઓ માટે 386-407 રૂપિયા પ્રતિ શેરની પ્રાઈસ બેન્ડ નક્કી કરી હતી. તેથી સોમવારે શેરબજાર પર શેર 519 રૂપિયાના લેવલ પર લિસ્ટ થશે તેવી ધારણા હતી.

કંપનીના આઈપીઓને બજારમાં જોરદાર પ્રતિભાવ મળ્યો હતો. ક્વોલિફાઈડ ઈન્સ્ટિટ્યૂશનલ બાયર્સ કેટેગરીમાં આ આઈપીઓ 48.91 ગણો સબસ્ક્રાઈબ થયો હતો. નોન-ઈન્સ્ટિટ્યૂશનલ ઈન્વેસ્ટર્સની કેટેગરીમાં આ આઈપીઓ 14.90 ગણો છલકાયો હતો. આ આઈપીઓ એકંદરે 32.23 ગણો છલકાયો હતો. આ કંપની ગુજરાતમાં કચ્છના રણ ખાતે ઈન્ડસ્ટ્રીયલ સોલ્ટનું પણ ઉત્પાદન કરે છે.

આર્કિયન કેમિકલ શું કામ કરે છે?
આર્કિયન કેમિકલ ઈન્ડસ્ટ્રીઝ (Archean Chemical Industries) એ અગ્રણી મરિન કેમિકલ ઉત્પાદક છે જે બ્રોમાઈનના ઉત્પાદન અને નિકાસ, ઈન્ડસ્ટ્રીયલ સોલ્ટ વગેરેના ઉત્પાદન સાથે સંકળાયેલી છે. આ ઉપરાંત તે વોલ્યુમની દૃષ્ટિએ પણ સૌથી મોટી નિકાસકાર છે. તેના EBITDA અને PAT માર્જિનમાં સતત વધારો થઈ રહ્યો છે. ઈશ્યૂ પ્રાઈસના અપર બેન્ડ પર પીઈ રેશિયો 26.54 ગણો છે.

કંપનીએ આ ઈશ્યૂ ખુલતા પહેલાં એન્કર ઈન્વેસ્ટર્સ પાસેથી રૂ. 658 કરોડ એકત્ર કર્યા હતા. કંપનીએ શેર દીઠ રૂ. 407ના દરે એન્કર રોકાણકારોને 1,61,67,991 ઇક્વિટી શેર ફાળવ્યા હતા. ગોલ્ડમૅન સૅક્સ, અબુ ધાબી ઇન્વેસ્ટમેન્ટ ઑથોરિટી, Segantii India Mauritius, BNP Paribas, Societe Generale,ગવર્નમેન્ટ પેન્શન ફંડ ગ્લોબલ, ICICI પ્રુડેન્શિયલ, DSP સ્મોલ કેપ ફંડ, ટાટા મ્યુચ્યુઅલ ફંડ, SBI મ્યુચ્યુઅલ ફંડ, નિપ્પોન ઇન્ડિયા મ્યુચ્યુઅલ ફંડ અને આદિત્ય બિરલા સનલાઇફ ઇન્શ્યોરન્સ તેના એન્કર ઈન્વેસ્ટર છે.