આગામી સપ્તાહે બેન્ક સહિત ચાર સેક્ટર બજારને આઉટપરફોર્મ કરે તેવી શક્યતા

ગયા સપ્તાહમાં ભારતીય શેરબજારમાં બંને તરફી ચાલ જોવા મળી હતી. શરૂઆતના બે દિવસ બજારમાં ઘટાડો થયા પછી બજાર વધ્યું અને લગભગ 50 ટકા સુધી રિકવરી આવી ગઈ હતી. છેલ્લા પાંચ દિવસમાં શેરબજાર એકંદરે પોઝિટિવ રહ્યું અને અગાઉની સપોર્ટ સપાટી ફરીથી મેળવી હતી. આ દરમિયાન ટ્રેડિંગની રેન્જ પણ વિશાળ રહી હતી, જેમાં નિફ્ટીમાં 558 પોઈન્ટની વધઘટ રહી અને સપ્તાહના અંતે વધીને બંધ આવ્યો હતો. સાપ્તાહિક રીતે જોવામાં આવે તો નિફ્ટી 50 ઈન્ડેક્સ 405 પોઈન્ટ વધીને બંધ આવ્યો હતો.

એક્સપર્ટ્સના માનવા પ્રમાણે હવે બજારમાં સ્ટોક સ્પેસિફિક ચાલ જોવા મળી શકે છે. એટલે કે કોઈ એક સેક્ટરનો દેખાવ નબળો હોય તો પણ તેના અમુક સ્ટોક્સ બહુ સારું પરફોર્મન્સ કરી શકે છે. આગામી સપ્તાહમાં નિફ્ટી માટે 15700ના સ્તરની ઉપર રહેવું જરૂરી છે. નિફ્ટી માટે 15700નો સ્તર એ ડબલ બોટમ સપોર્ટ છે અને તે રેઝિસ્ટન્સ તરીકે કામ કરી શકે છે. નિફ્ટી આ સ્તરથી ઉપર રહેશે તો બજારને મજબૂતી મળવાની શક્યતા છે. 15830થી 16000 એક તાત્કાલિક રેઝિસ્ટન્સ લેવલ તરીકે કામ કરી શકે છે. ટ્રેડિંગ રેન્જ પણ સામાન્ય કરતા વધારે પહોળી રહેવાની શક્યતા છે.

ડેરિવેટિવ ડેટા દર્શાવે છે કે સંભવિત ટ્રેડિંગ રેન્જ 15500થી 16000 રહી શકે છે. પરંતુ જો બજાર વધશે તો તેના માટે 15700ના સ્તરની ઉપર રહેવું મહત્ત્વપૂર્ણ રહેશે.

કયા સેક્ટર આઉટપરફોર્મન્સ કરશે
એનાલિસ્ટ દ્વારા ચાર્ટનો અભ્યાસ કર્યા પછી જણાવવામાં આવે છે કે નિફ્ટી બેન્ક, ઓટો, એફએમસીજી, કન્ઝમ્પશન ઈન્ડેકસ બીજા કરતા વધુ સારો દેખાવ કરે તેવી શક્યતા છે. જ્યારે નિફ્ટી ફાર્મા, કોમોડિટી, એનર્જી અને પીએસઈ ઈન્ડેક્સ નબળો દેખાવ કરે તેવી સંભાવના છે.
તેવી જ રીતે નિફ્ટી મેટલ ઈન્ડેક્સનો દેખાવ પણ નબળો રહી શકે છે. જ્યારે નિફ્ટી આઇટી અને સર્વિસિસ સેક્ટર ઇન્ડેક્સ તેનું રિલેટિવ મોમેન્ટમ સુધારવા પ્રયાસ કરે છે.

અત્યાર સુધી ભારે વેચવાલીભારતીય બજારમાંથી એફઆઈઆઈની વેચવાલી હજુ પણ જારી છે. છેલ્લા 15 મહિનામાં ભારતીય બજારમાંથી લગભગ ચાર લાખ કરોડ રૂપિયા ખેંચી લેવાયા છે. ગયા અઠવાડિયામાં સેન્સેક્સમાં 1400 પોઈન્ટનો વધારો થયો હોવા છતાં વિદેશી રોકાણકારોનો ભરોસો હજુ પણ જોવા મળતો નથી. મોટા ભાગની ખરીદી સ્થાનિક ફંડ્સ દ્વારા કરવામાં આવી છે.