DCX Systemsનું 39 ટકાના પ્રીમિયમે જોરદાર લિસ્ટિંગઃ રોકાણકારોને તગડી કમાણી

DCX સિસ્ટમ્સ (DCX Systems)નો આઈપીઓ સફળ રહ્યા બાદ બજારમાં તેનું લિસ્ટિંગ પણ ધમાકેદાર રહ્યું છે. આ શેર આજે 39 ટકાના પ્રીમિયમ ભાવે લિસ્ટ થયો છે. 207 રૂપિયાની ઈશ્યૂ પ્રાઈસની સામે BSE પર આ શેર 39 ટકા વધીને 286.25 પર લિસ્ટ થયો હતો. DCX Systems એ ઈલેક્ટ્રોનિક સબ-સિસ્ટમ્સ અને કેબલ હાર્નેસનું ઉત્પાદન કરતી કંપની છે. એનએસઈ પર આ શેર 287 રૂપિયાના પ્રીમિયમે લિસ્ટ થયો હતો. આ શેરનું બજારમાં લિસ્ટિંગ થયું તેનાથી અગાઉ ગ્રે માર્કેટમાં 88થી 90 રૂપિયા પ્રીમિયમ ચાલતું હતું. ડીસીએક્સ સિસ્ટમ્સનો આઈપીઓ 31 ઓક્ટોબરથી બીજી નવેમ્બર વચ્ચે સબસ્ક્રિપ્શન માટે ખુલ્યો હતો.

કંપનીએ આઈપીઓ દ્વારા બજારમાંથી 500 કરોડ રૂપિયા એકત્ર કર્યા હતા. આ IPOમાં 197 રૂપિયાથી 207 રૂપિયાની રેન્જમાં શેર ઓફર કરવામાં આવ્યા હતા. એડલવાઈઝ ફાઈનાન્શિયલ સર્વિસિસ, એક્સિસ કેપિટલ અને સેફ્રન કેપિટલ એડવાઈઝર્સ આ આઈપીઓ માટે બુક રનિંગ લીડ મેનેજર્સ હતા.

આ ઈશ્યૂ 69.79 ગણો છલકાયો હતો જેમાં ક્વોલિફાઈડ ઇન્સ્ટિટ્યૂશન્સનો હિસ્સો 84.32 ગણો છલકાયો હતો જ્યારે બિન સંસ્થાકીય કેટેગરીમાં ઈશ્યૂ 43.97 ગણો છલકાયો હતો. 2011માં સ્થાપવામાં આવેલી DCX સિસ્ટમ્સ લિમિટેડ (DSL) એ ઇલેક્ટ્રોનિક સબ-સિસ્ટમ્સ અને કેબલ હાર્નેસનું ઉત્પાદન કરતી અગ્રણી ભારતીય કંપની છે. તે બેંગલુરુ ખાતે હાઈ-ટેક ડિફેન્સ એન્ડ એરોસ્પેસ પાર્ક સેઝમાં પોતાનું યુનિટ ધરાવે છે.

ચોઈસ બ્રોકિંગે આ ઈશ્યૂ માટે 'સબસ્ક્રાઈબ' રેટિંગ આપીને જણાવ્યું હતું કે હાયર પ્રાઈસ બેન્ડ પર DCX Systems 1.2 ગણો EV/સેલ્સ ધરાવે છે જે તેના હરીફોની એવરેજ કરતા નીચો છે. ડિફેન્સ મેન્યુફેક્ચરિંગ સેક્ટરમાં હાલમાં જે તેજી ચાલે છે તેના કારણે આ કંપની માટે ગ્રોથની પુષ્કળ શક્યતા રહેલી છે.

એન્જલ વને પણ આ ઈશ્યૂને સબસ્ક્રાઈબ રેટિંગ આપ્યું હતું. તેણે કહ્યું હતું કે હરીફ કંપનીઓ પારસ ડિફેન્સ એન્ડ સ્પેસ ટેક્નોલોજી, ડેટા પેટર્ન્સ અને સુંદરમ ફાસ્ટનર્સ સાથે તુલના કરવામાં આવે તો DCXનો પોસ્ટ-ઈશ્યૂ પીઈ નીચો જણાય છે. છેલ્લા બે વર્ષમાં આ કંપનીનો ટેક્સ બાદ નફો વધુ સારી રેવન્યુ ધરાવે છે અને ઇક્વિટીમાંથી તંદુરસ્ત રિટર્ન આપ્યું છે. આ તમામ પરિબળો અને વાજબી ભાવને ધ્યાનમાં લેતા આ ઈશ્યૂ રોકાણ માટે યોગ્ય છે.

20થી વધુ સેક્ટર્સની એક્સક્લુઝિવ અને ઊંડાણપૂર્વકની માહિતી મેળવવા માટે વાંચો ઈકોનોમિક ટાઈમ્સ. સબસ્ક્રાઈબ કરવા માટે ક્લિક કરો.
Disclaimer: આ લેખનો હેતુ માત્ર માહિતી આપવા માટેનો છે. કોઈપણ રોકાણ કરતા પહેલા આપના ફાઈનાન્શિયલ એડવાઈઝરની સલાહ ચોક્કસ લો.