Electronics Mart Indiaના શેરનું 52 ટકા પ્રીમિયમે ધમાકેદાર લિસ્ટિંગ, શેર સીધો 90 રૂપિયા થયો

Electronics Mart India Listing: ઈલેક્ટ્રોનિક્સ માર્ટ ઈન્ડિયાના શેરનું આજે બજારમાં ધમાકેદાર લિસ્ટિંગ થયું છે અને શેર સીધો 52 ટકા વધીને રૂ. 90 પર લિસ્ટ થયો છે. આ શેર માટે ગ્રે માર્કેટ પ્રીમિયમ (GMP) સારું એવું ચાલતું હતું ત્યારથી તેના આકર્ષક લિસ્ટિંગનો અંદાજ હતો. શેર આટલો ઉંચે ખુલશે તેની કદાચ ધારણા ન હતી. આ લખાય છે ત્યારે BSE પર શેર 49 ટકા વધીને રૂ. 88 પર ચાલતો હતો. આજે લિસ્ટિંગ થયું તે અગાઉ કેટલાક એક્સપર્ટ માનતા હતા કે શેર બહુ ધમાકેદાર નહીં વધે પરંતુ ડિસન્ટ લિસ્ટિંગ થશે. ઈલેક્ટ્રોનિક્સ માર્ટના શેરને B ગ્રૂપના સ્ટોક્સમાં મુકવામાં આવ્યા છે.

આટલું જોરદાર લિસ્ટિંગ કઈ રીતે?
એક્સપર્ટ્સના માનવા પ્રમાણે ઈલેક્ટ્રોનિક્સ માર્ટ (Electronics Mart India)નો IPO વાજબી ભાવે આવ્યો હતો જેના કારણે રોકાણકારોને તેમાં મૂડી રોકવામાં ભરોસો પડ્યો હતો. આ કંપની જે સેક્ટરમાં કામ કરે છે તેમાં ગ્રોથની શક્યતા પણ વધારે છે અને તે ચોક્કસ બજારોમાં તેનો બજાર હિસ્સો સતત વધારી રહી છે. આ શેરની ફાળવણી થયા પછી તેમાં લગભગ 30 રૂપિયાનું પ્રીમિયમ ચાલતું હતું તેથી શેર વધશે તેવી ધારણા પહેલેથી હતી.

શેરમાર્કેટના એક્સપર્ટ અભય દોશીએ જણાવ્યું કે ઈલેક્ટ્રોનિક્સ માર્ટ ઈન્ડિયાના આઈપીઓ (Electronics Mart India IPO)નો ભાવ આકર્ષક હતો. તેના કારણે રોકાણકારોના હાથમાં સારી એવી મૂડી આવે તેમ હતી. આ ઉપરાંત ઇશ્યૂની સાઈઝ નાની હતી જેના કારણે આ ઈશ્યૂ માટે ભારે રસ જોવા મળ્યો હતો. કંપનીના વેલ્યૂએશન અને રિસ્પોન્સને ધ્યાનમાં રાખતા 40થી 50 ટકા પ્રીમિયમે લિસ્ટિંગની અપેક્ષા હતી. ઈલેક્ટ્રોનિક્સ માર્ટ ઈન્ડિયાના ઓપનિંગ પ્રાઈસ વિશે એક્સપર્ટ મનોજ દાલમિયાએ જણાવ્યું કે શેર એલોટમેન્ટ અગાઉ પ્રીમિયમ ઘટીને 24 થયું હતું જે અગાઉ 30 રૂપિયા ચાલતું હતું. અમારી ધારણા હતી કે આ શેર 86થી 89 રૂપિયાના ભાવની આસપાસ લિસ્ટ થશે.

ઈલેક્ટ્રોનિક્સ માર્ટના ઈશ્યુને રોકાણકારો તરફથી સારો એવો પ્રતિસાદ મળ્યો હતો. આ ઈશ્યૂ લગભગ 72 ગણો સબ્સ્ક્રાઇબ થયો હતો. આ કંપનીએ IPO વખતે રૂ. 59ના ભાવે તેના શેર ઈશ્યૂ કર્યા હતા. નિષ્ણાંતોએ આ શેર વિશે જણાવ્યું કે, કંપનીના વધુ સારા વેલ્યુએશન, મજબૂત નાણાકીય આયોજનના કારણે લિસ્ટિંગ સારું રહેવાની ધારણા હતી. ઈલેક્ટ્રોનિક્સ માર્ટે તેના આઈપીઓ દ્વારા કુલ રૂ. 500 કરોડ એકત્ર કર્યા છે. આ નાણાંનો ઉપયોગ તેના વિસ્તરણ, નવા સ્ટોર અને વેરહાઉસ જેવી પ્રાથમિક જરૂરિયાતો પૂરી કરવા અને દેવું ચૂકવવામાં કરશે.