ઈંધણ ખરીદવા શ્રીલંકાએ ભારત પાસે માંગી 500 મિલિયન ડોલરની લોન

કોલંબોઃ શ્રીલંકા હાલમાં સંકટનો સામનો કરી રહ્યું છે. શ્રીલંકાએ પોતાના પોતાના ફ્યુઅલ (ઈંધણ)ની ખરીદીની ચૂકવણી કરવા માટે ભારત પાસે 500 મિલિયન ડોલરની લોનની માંગણી કરી છે. શ્રીલંકા તરફથી આ માંગણી ઉર્જા મંત્રી ઉદય ગમ્મનપિલાના તે નિવેદન બાદ આવી છે જેમાં તેમણે ચેતવણી આપતા કહ્યું હતું કે, દેશમાં ઈંધણની વર્તમાન ઉપલબ્ધતાની ગેરંટી આગામી વર્ષે જાન્યુઆરી સુધી જ આપી શકાય છે.

શ્રીલંકાની સરકારી ઓઈલ કંપની સીલોન પેટ્રોલિયમ કોર્પોરેશન (સીપીસી) પર પહેલાથી જ દેશની બે મોટી સરકારી બેન્કો બેન્ક ઓફ સીલોન અને પીપલ્સ બેન્કનું 3.3 અબજ ડોલરનું દેવું બાકી છે. સીપીસી પશ્ચિમ એશિયાથી ઈંધણની આયાત કરે છે.

એક સ્થાનિક સમાચાર વેબસાઈટે સીપીસીના ચેરમેન સુમિત વિજયસિંઘેને ટાંકતા કહ્યું છે કે, અમે ભારત અને શ્રીલંકાની આર્થિક ભાગીદારીની વ્યવસ્થા અંતર્ગત 50 કરોડ ડોલરની લોનની સુવિધા મેળવવા માટે વર્તમાનમાં અહીં ભારતીય ઉચ્ચાયોગ સાથે વાતચીત કરી રહ્યા છીએ. આ લોનની સુવિધાનો ઉપયોગ પેટ્રોલ અને ડીઝલની જરૂરી ખરીદી માટે કરવામાં આવશે.

ઉલ્લેખનીય છે કે વૈશ્વિક સ્તરે ઓઈલની કિંમતમાં વધારો થયો છે અને તેના કારણે શ્રીલંકાને આ વર્ષે ઓઈલની આયાત માટે વધારે ખર્ચો કરવો પડ્યો છે. ગત વર્ષની તુલનામાં આ વર્ષના પ્રથમ સાત મહિનામાં દેશના ઓઈલ બિલમાં 41.5 ટકાનો વધારો થયો છે અને તે બે અબજ ડોલર પહોંચી ગયો છે.

નોંધનીય છે કે શ્રીલંકાને ટૂરિઝમમાંથી ઘણી મોટી આવક થાય છે પરંતુ કોરોના વાયરસના કારણે દેશમાં હાલમાં ટૂરિઝમના ઉદ્યોગને મોટો ફટકો પડ્યો છે. જેના કારણે શ્રીલંકા ફોરેન એક્સચેન્જ કટોકટીનો સામનો કરી રહ્યું છે, તેમ નાણા મંત્રી બાસિલ રાજપક્સાએ ગત મહિને જણાવ્યું હતું.