Gold Silver Price Today: સોનામાં બે દિવસમાં રૂ. 1000નું ગાબડુંઃ ભાવ એક મહિનાના તળિયે પહોંચ્યો

ભારતીય બજારમાં આજે સોના અને ચાંદીના ભાવ (Gold Silver Price)માં મિક્સ ટ્રેન્ડ જોવા મળ્યો છે. અગાઉના બે દિવસમાં સોનું 1000 રૂપિયા સુધી ઘટ્યા પછી હવે એક મહિનાના તળિયાની નજીક છે. ઇન્ટરનેશનલ પ્રાઈસની સાથે MCX પર ગોલ્ડ ફ્યુચર્સ 0.2 ટકા વધીને 10 ગ્રામે 51,660 થયો હતો. ચાંદીનો કોન્ટ્રાક્ટ 0.4 ટકા ઘટીને 56,696 પ્રતિ કિલો થયો હતો. ગ્લોબલ માર્કેટમાં તાજેતરની નીચી સપાટીએથી થોડો વધ્યો છે. યુએસ ફેડ હવે વ્યાજદર વધારવા માટે પહેલા જેટલું આક્રમક નથી તેવા અણસાર મળ્યા પછી ડોલર અને ટ્રેઝરી યીલ્ડમાં ઘટાડો થયો છે.

યુએસ ફેડ (US Fed rate hike)ની જુલાઈની મિટિંગની મિનટ્સ બુધવારે રિલિઝ થઈ છે. તેમાં ફેડના અધિકારીઓએ જણાવ્યું કે ભવિષ્યમાં રેટ કેટલા વધારવામાં આવે છે તેનો આધાર ઇકોનોમિક ડેટા પર રહેશે. આ ઉપરાંત અમેરિકન ઈકોનોમી નવા રેટ સાથે કઈ રીતે એડજસ્ટ કરે છે તે જોવાનું રહેશે. IFAના જણાવ્યા પ્રમાણે યુએસ ફેડ હવે આક્રમક રીતે રેટ નહીં વધારે. પોલિસી એક્શન નક્કી કરવા માટે કોઈ ગાઈડન્સ નથી. અગાઉના સેશનમાં સ્પોટ ગોલ્ડનો ભાવ તળિયે પહોંચ્યા પછી 0.3 ટકા વધીને 1765.89 ડોલર પ્રતિ ઔંસ થયો હતો. અન્ય કિંમતી ધાતુઓમાં સ્પોટ સિલ્વરનો ભાવ સહેજ ઘટીને 19.80 ડોલર પ્રતિ ઔંસ થયો હતો.

કોટક સિક્યોરિટીઝના કોમોડિટી રિસર્ચ હેડ રવિન્દ્ર રાવે જણાવ્યું કે, યુએસ ડોલર ઈન્ડેક્સની બંને તરફી ચાલ વચ્ચે કોમેક્સ પર ગોલ્ડ વધીને 1780 ડોલર પ્રતિ ઔંસ થયું છે. અમેરિકન સેન્ટ્રલ બેન્ક રેટ વધારવાનું હજુ થોડા સમય માટે જારી રાખશે પરંતુ તે નાણાકીય નીતિને વધારે પડતી ચુસ્ત નહીં કરે. કારણ કે તેનાથી ઈકોનોમી પર અસર થઈ શકે છે. ગોલ્ડ હજુ થોડા સમય માટે વોલેટાઈલ રહી શકે છે કારણ કે વૈશ્વિક બજારમાં હજુ ગ્રોથની ચિંતા છે. યુએસમાં વ્યાજદર વધારવામાં આવશે તો કન્ઝ્યુમર ડિમાન્ડ ઘટવાની બીક છે. હજુ અમેરિકન ડોલરને સપોર્ટ જારી રહેશે જેના કારણે ગોલ્ડ પર પ્રેશર આવી શકે છે.

રોકાણકારોને ગોલ્ડમાં રસ ઘટ્યોતાજેતરમાં સોનાના ભાવમાં ઘટાડો થયો હોવા છતાં તેમાં રોકાણકારોનો રસ ઘટી ગયો છે. વિશ્વના સૌથી મોટા ગોલ્ડ આધારિત ઇટીએફ SPDR ગોલ્ડ ટ્રસ્ટનું હોલ્ડિંગ 0.32 ટકા ઘટીને 989 ટન થયું હતું જે મંગળવારે 992.20 ટન હતું. એનાલિસ્ટ માને છે કે તાઈવાનના મુદ્દે અમેરિકા અને ચીન વચ્ચે તણાવ સર્જાયો ત્યારે સોનું વધ્યું હતું, પરંતુ હવે બંને દેશો વાટાઘાટ કરવા માટે સહમત થયા છે.