Gold Silver Price Today: સોનું ઘટીને બે મહિનાના તળિયે, ચાંદીના ભાવમાં પણ સતત ઘટાડો

Gold Silver price: ફુગાવો વધતો હોય ત્યારે સામાન્ય રીતે લોકો સોનાની ખરીદી વધારી દેતા હોય છે, પરંતુ અત્યારે સોનામાં ઘટાડાનો ટ્રેન્ડ ચાલે છે. ગોલ્ડે આજે બે મહિનાની નીચી સપાટી બનાવી (Gold price fall) હતી જ્યારે ચાંદી બે વર્ષની નીચી સપાટીએ પહોંચી છે. ગ્લોબલ ટ્રેન્ડના કારણે ભારતમાં પણ ગોલ્ડ અને સિલ્વરમાં નરમાઈ ચાલે છે. MCX પર સોનાનો ભાવ 0.4 ટકા ઘટીને બે મહિનાની નીચી સપાટી રૂ. 50,200 થયો હતો. જ્યારે ચાંદીનો ભાવ કિલો દીઠ રૂ. 52,395ની નીચી સપાટીએ પહોંચ્યો હતો.

અમેરિકન ડોલરની મજબૂતીના કારણે ગ્લોબલ માર્કેટમાં સોનાનો ભાવ ઘટીને બે મહિનાના તળિયાની નજીક હતો. ડોલર ઈન્ડેક્સ 0.29 ટકા વધવાના કારણે પીળી ધાતુનો ભાવ 0.3 ટકા વધીને 1706 ડોલર પ્રતિ ઔંસ થયો તો. US ફેડરલ રિઝર્વ દ્વારા વ્યાજનીતિ વધુ આક્રમક બનશે તેવી ધારણાએ બોન્ડ યીલ્ડમાં પણ વધારો થયો છે. સોનાની ખરીદી કરવાથી ફુગાવા સામે રક્ષણ મળે છે તે જાણીતી બાબત છે, પરંતુ ડોલરનો ભાવ વધારે હોવાના કારણે ગોલ્ડને હોલ્ડ કરી રાખવાનો ખર્ચ વધી જાય છે.

એક્સપર્ટના જણાવ્યા પ્રમાણે અમેરિકન ડોલર અને બોન્ડ યીલ્ડમાં નોંધપાત્ર કરેક્શન નહીં આવે ત્યાં સુધી સોના પર દબાણ જળવાઈ રહેવાની શક્યતા છે. સોનું તાજેતરમાં ટોચ પર પહોંચ્યા પછી તેમાં કરેક્શન જારી છે જે હજુ પણ ચાલુ રહી શકે છે. અત્યારે ચાઈનીઝ અર્થતંત્રની સ્થિતિ અંગે ચિંતા છે. કોવિડ પછી ચીનનું અર્થતંત્ર સંપૂર્ણપણે અસરમાંથી બહાર આવી શક્યું નથી. Gold ETFમાં આઉટફ્લોમાં પણ વધારો થયો છે. તેના કારણે સોનું બે મહિનાની નીચી સપાટીની નજીક છે.

કોમોડિટીના એક્સપર્ટ જણાવે છે કે સોનું તાજેતરની ઉંચી સપાટીએથી ઘટ્યું છે અને નજીકના ગાળામાં 1700 ડોલર પ્રતિ ઔંસના સ્તરે તેને સપોર્ટ મળે છે. જોકે, હજુ પણ સોનામાં નરમાશ ચાલુ રહેવાની શક્યતા છે. અન્ય કિંમતી ધાતુઓની વાત કરીએ તો હાજર બજારમાં ચાંદીનો ભાવ 0.8 ટકા ઘટીને 17.83 ડોલર પ્રતિ ઔંસ થયો હતો. ચાદી બે વર્ષ કરતા વધુ સમયની નીચી સપાટીએ છે. ગોલ્ડના ભાવમાં તાજેતરના ઘટાડા પછી પણ રોકાણકારો હજુ સોનું ખરીદવા ઉત્સાહિત નથી. વિશ્વના સૌથી મોટા ગોલ્ડ આધારિત એક્સચેન્જ ટ્રેડેડ ફંડ SPDR ગોલ્ડ ટ્રસ્ટનું હોલ્ડિંગ 0.3 ટકા ઘટીને 973.37 ટન થયું હતું.