આઈ લવ યુ રસના:અરીઝ પિરોઝશો ખંભાતાને કેવી રીતે આવ્યો રસનાનો આઈડિયા, 60 દેશોમાં બની લોકપ્રિય બ્રાંડ

રસના ગ્રુપના ફાઉન્ડર ચેરમેન અરીઝ પિરોઝશો ખંભાતાનું તાજેતરમાં અવસાન થયું છે. 85 વર્ષિય ખંભાતાએ ભારતીય ઉદ્યોગ, વ્યાપાર અને સમાજ સેવામાં બહૂમુલ્ય યોગદાન આપ્યું હતું. તેમના દ્વારા સ્થાપવામાં આવેલી રસના (Rasna) નામ વિશે વિશેષ ઓળખ આપવાની જરૂર નથી, કારણ કે તે ભારત ઉપરાંત વિશ્વભરના અનેક દેશોમાં લોકોને ગરમીમાં રાહત આપવાનું કામ કર્યું છે અને એટલે જ તો તેની 'I Love You Rasna' ની એ લાઈન સૌને યાદ જ છે. પણ શું તમે જાણો છો કે રસના અંગેનો વિચાર કેવી રીતે આવ્યો હતો અને તે આજે આટલી લોકપ્રિય બ્રાન્ડ કેવી રીતે બની ગઈ.

રસનાની શરૂઆત 70ના દાયકામાં થયેલી
રસનાના ફાઉન્ડેશન અરીઝ ખંભાતાએ 85 વર્ષની ઉંમરે અંતિમ શ્વાસ લીધા. તેઓ બેનેવોલેંટ ટ્રસ્ટ તથા રસના ફાઉન્ડેશનના ચેરમેન પણ હતા. ખંભાતાએ 1970ના દાયકામાં વાજબી કિંમતથી સોફ્ટ ડ્રિંક ઉપલબ્ધ કરાવવાનો વિચાર આવ્યો અને આ માટે આ યોજના પર આગળ વધ્યા. અમદાવાદમાં એક રેડી ટુ સર્વ સોફ્ટ ડ્રિંક રજૂ કર્યું. ઓરેન્જ ફ્લેવરના આ ડ્રિંકનું નામ 'જાફે' રાખવામાં આવ્યું હતું. જોકે આ નામથી પ્રોડક્ટ વિશેષ લોકપ્રિય બની શકી નહીં. ત્યારબાદ તેનું નામ બદલવાનું નક્કી કર્યું.

જાફે થી બદલીને રસના નામ રાખવામાં આવ્યું
વર્ષો સુધી જાફે તરીકેના નામને બદલવા માટે સંશોધન કરવામાં આવતું રહ્યું. છેવટે અરીઝ પિરોજશો ખંભાતાને એક નવું નામ મળી જ ગયું. વર્ષ 1979માં તેમણે પોતાના સોફ્ટ ડ્રિંકને રિલોંચ કર્યું અને તેને Rasna (રસના) નામ આપવામાં આવ્યું. ત્યારબાદ તો આ બ્રાંડે પાછળ વળીને જોયું જ નહીં અને અસાધારણ સફળતા હાંસલ કરી. શ્રીમંત હોય કે ગરીબ સૌ વચ્ચે તે ખૂબ જ લોકપ્રિય બની ગઈ. આજે પણ તે રૂપિયા એકના પેકથી લઈ વિવિધ કિંમતે ઉપલબ્ધ છે.ૉ

I Love You Rasna જાહેરાતે લોકપ્રિયતામાં અનેક ગણો વધારો કર્યો
રસનાની સફળતા પાછળ તેન 80-90ના દાયકામાં બહુચર્ચિત જાહેરાતનું મોટું યોગદાન રહ્યું છે. તેની ટેગ લાઈન I Love You Rasna જાહેરાતમાં જોવા મળેલી પ્રથમ રસના ગર્લ અંકિતા ઝવેરી હતી. જોકે ત્યારબાદ તરુણી સચદેવા અને મેગા સ્ટાર અમિતાભ બચ્ચન પણ જાહેરાતમાં જોવા મળેલા. આ જાહેરાતે રસનાને ઘરે ઘરે પહોંચાડી દીધી.