ઘરનું ઘર ખરીદવાનો પ્લાન છે? તો અત્યારથી જ આ મુજબ બચત શરૂ કરી દો

ઘરની ખરીદી કરવી એ જીવનમાં સૌથી મહત્ત્વનો નિર્ણય હોય છે તેથી તેના માટે ઘણું બધું પ્લાનિંગ કરવું પડે છે. ઘર ખરીદવું એ કોઈ નાની વાત નથી તેથી તેના માટે પુષ્કળ નાણાંની જરૂર પડે છે. પરિણામે શક્ય એટલી નાની વયથી ઘરની ખરીદી માટે બચત કરવામાં આવે તે આવશ્યક છે. ફાઈનાન્સ સેક્ટરના નિષ્ણાતો ઘર ખરીદવા માંગતા લોકો માટે એક સ્ટ્રેટેજી જણાવે છે. તેનું પાલન કરીને આસાનીથી ઘર ખરીદી શકાશે અને વધારાનો બોજ પણ નહીં આવે.

50-30-20નો નિયમ અનુસરો
તમારી જે આવક હોય તેમાંથી 50 ટકા રકમ નિશ્ચિત ખર્ચ માટે વપરાવી જોઈએ. આ ઉપરાંત તમે 30 ટકા ખર્ચ અન્ય ચીજો માટે ખર્ચ કરી શકો જે દર મહિને ફિક્સ રકમ નથી હોતી. ત્યાર પછી તમારે ઓછામાં ઓછા 20 ટકા મૂડીની બચત કરવી જોઈએ. તમે આ રીતે બચત કરશો તો લાંબા ગાળે સારી એવી મૂડી એકઠી થશે અને ઘર ખરીદવામાં મદદરૂપ બનશે.

ઓચિંતી આવક થાય તેને ઈન્વેસ્ટ કરો
તમારી કંપની તમને બોનસ આપે, ટેક્સ રિફંડ મળે, અથવા અન્ય કોઈ અણધારી આવક થાય ત્યારે તેને ખર્ચ કરી નાખવાના બદલે ઈન્વેસ્ટ કરો. આ રકમનો એક અલગથી હિસાબ રાખો અને તેમાં ધીમે ધીમે મૂડી એકઠી કરતા જાવ. તમે આ માટે અલગ બેન્ક એકાઉન્ટ પણ રાખી શકો.

સાતત્ય જાળવો
રોકાણ કરવાની પ્રક્રિયામાં સાતત્ય જરૂરી છે. તમારે શિસ્તબદ્ધ રીતે બચત કરવી પડશે અને દર મહિને રોકાણ કરવું પડશે. આ માટે તમે મ્યુચ્યુઅલ ફંડમાં કે સ્ટોકમાં એસઆઈપી ખોલાવીને મૂડી રોકી શકો.

ડાઉનપેમેન્ટની વ્યવસ્થા
તમે ઘર ખરીદો ત્યારે તમારે ડાઉનપેમેન્ટ આપવું પડશે. આ રકમ અમુક હજાર રૂપિયાથી લઈને લાખ રૂપિયા સુધી હોઈ શકે છે. તમારું ઘર કેવા પ્રકારનું છે તેનો અંદાજ કરીને ડાઉન પેમેન્ટ માટે પહેલેથી બચત શરૂ કરી દો. આ માટે તમે નાણાકીય બાબતોના એક્સપર્ટની સલાહ પણ લઈ શકો છો.

પબ્લિક પ્રોવિડન્ટ ફંડ (PPF)
પબ્લિક પ્રોવિડન્ટ ફંડ એ ટેક્સ બચાવવાના સૌથી લોકપ્રિય સાધનો પૈકી એક છે. તેમાં તમારે દર વર્ષે ઓછામાં ઓછા 500 રૂપિયા અને વધુમાં વધુ 1.50 લાખ રૂપિયાની બચત રોકવાની હોય છે. તેના પર તમને 8.10 ટકા વ્યાજ મળે છે અને દર વર્ષે તમે 46,500 રૂપિયાની બચત કરી શકો છો. પીપીએફ ઈન્વેસ્ટમેન્ટ માટે પાંચ વર્ષનો લોક ઈન ગાળો હોય છે. પરંતુ તમે પ્રિ-મેચ્યોર ઉપાડ કરી શકો છો.

બેન્ક ડિપોઝિટ
બેન્કોમાં ટર્મ ડિપોઝિટ પર પણ અત્યારે 6.90 ટકા સુધી ઉંચું વ્યાજ મળે છે. તમે ઈચ્છો તો એક રિકરિંગ એકાઉન્ટ ખોલાવી શકો. જોકે, લાંબા ગાળાના નાણાકીય આયોજન માટે બેન્ક એફડી એ સારો વિકલ્પ નથી.

RBIના બોન્ડ
મિડલ ક્લાસના રોકાણકારો આરબીઆઈના બોન્ડમાં પણ ઈન્વેસ્ટ કરીને વળતર મેળવી શકે છે. તમે સાત વર્ષ માટેના બોન્ડ ખરીદ્યા હોય તો હાલમાં તેના પર 7.42 ટકા સુધી વ્યાજ ઓફર થાય છે. આ બોન્ડને સોવેરિન ગેરંટી હોય છે તેથી તે સૌથી વધારે સુરક્ષિત હોય છે.

આ ઉપરાંત તમે ડેટ મ્યુચ્યુઅલ ફંડ અને NPS (નેશનલ પેન્શન સ્કીમ)માં પણ તમે રોકાણ કરી શકો છો. એનપીએસમાં રોકાણ કરીને તમે 50,000 રૂપિયા સુધી ટેક્સ બચાવી શકો છો.