દલાલ સ્ટ્રીટમાં IPOની મોસમ જામશેઃ 12 હજાર કરોડના પબ્લિક ઈશ્યૂની તૈયારી

IPO News: ભારતીય શેરબજારમાં આગામી દિવસોમાં IPOની મોસમ આવી રહી છે. લગભગ એક ડઝનથી વધુ કંપનીઓ પ્રાઈમરી માર્કેટમાં પોતાના ઈશ્યૂ લાવી રહી છે. કંપનીઓ IPO દ્વારા લગભગ 12 હજાર કરોડ રૂપિયા એકત્ર કરવાની યોજના ધરાવે છે તેમ બેન્કરોએ જણાવ્યું હતું. છેલ્લા કેટલાક દિવસથી બજારમાં IPOમાં રસ વધ્યો છે. સપ્ટેમ્બરમાં ડ્રીમફોક્સ સર્વિવિસનો શેર બમ્પર ઉછાળા સાથે લિસ્ટ થયો હતો.

કઈ કંપનીઓના આઈપીઓ આવશે
આગામી મહિને Five Star Business Finance, Global Health, Pristine Logistics, કેન્સ ટેકનોલોજી અને યુનિપાર્ટ્સ ઈન્ડિયા જેવી કંપનીઓ દિવાળી પહેલાં અથવા દિવાળી પછી તેમનો IPO લાવવા વિચારે છે તેમ સૂત્રોએ કહ્યું હતું. મે મહિનામાં કેટલાક IPO આવ્યા હતા જેને પાર પાડવામાં ઘણી મુશ્કેલી પડી હતી. રોકાણકારો અને કંપનીઓમાં હજુ સાવધાનીનો સૂર જોવા મળ્યો છે. જૂન અને જુલાઈ મહિનામાં શેરબજારમાં કોઈ IPO આવ્યા ન હતા. ત્યાર બાદ માત્ર છ કંપનીઓના IPO આવ્યા હતા જેમાં લગભગ 3500 કરોડ રૂપિયા એકત્ર કરવામાં આવ્યા છે. એપ્રિલ અને જૂન વચ્ચે નિફ્ટી50 ઈન્ડેક્સ 15 ટકા કરતા વધારે ઘટ્યો હતો.

અત્યારે એક સાથે આટલા IPO શા માટે
કોટક ઈન્વેસ્ટમેન્ટ બેન્કિંગ ખાતે કેપિટલ માર્કેટના હેડ વી જયશંકરે જણાવ્યું કે, જિયોપોલિટિકલ તણાવ, યુએસ ફેડ દ્વારા વ્યાજદરમાં તીવ્ર વધારો, ક્રૂડના ભાવમાં વધારો, ફુગાવો અને ગ્લોબલ ગ્રોથની ચિંતાના કારણે સેકન્ડરી તથા પ્રાઈમરી માર્કેટમાં મૂડને અસર થઈ હતી. તેના કારણે પાંચથી છ મહિનાથી બજારમાં IPO માર્કેટ નરમ હતું. હવે રોકાણકારોને લાગે છે કે વોલેટિલિટી ઘટશે અને બજાર હવો બોટમની નજીક આવી ગયું છે.

ચેન્નાઈમાં હેડક્વાર્ટર ધરાવતી ફાઈવ-સ્ટાર બિઝનેસ ફાઈનાન્સ 2752 કરોડ રૂપિયા એકત્ર કરવાની છે. આ કંપની દિવાળી પછી તેનો IPO લાવશે. નોન-બેન્કિંગ ફાઈનાન્સ કંપનીને જાન્યુઆરીમાં સેબીની મંજૂરી મળી ગઈ હતી. જાણીતા કાર્ડિયોલોજિસ્ટ નરેશ ત્રેહાન દ્વારા પ્રમોટેડ ગ્લોબલ હેલ્થ પણ આ મહિને તેનો IPO લાવવાની છે. આ હોસ્પિટલ ચેઈન રૂ. 2200થી 2500 કરોડ એકત્ર કરશે જેમાં 500 કરોડના નવા શેર વેચવામાં આવશે. આ કંપની મેદાંતા બ્રાન્ડ હેઠળ હોસ્પિટલોનું સંચાલન કરે છે.

Pristine Logistics 1200 કરોડનો ઈશ્યૂ લાવશે જ્યારે Kaynes Technology 1000 કરોડ એકત્ર કરવાની યોજના ધરાવે છે. અન્ય કંપનીઓમાં યુનિપાર્ટ્સ ઈન્ડિયા 1000 કરોડ, કીસ્ટોન રિયલ્ટર્સ રૂ. 850 કરોડ અને લેન્ડમાર્ક કાર્સ દ્વારા 762 કરોડ એકત્ર કરવામાં આવશે. DCX Systems પણ 600 કરોડ અને INOX Green રૂ. 500 કરોડનો ઈશ્યૂ લાવશે.