ભારતીય રેલવેની કંપની IRFCનો શેર રોકેટની જેમ કેમ વધવા લાગ્યો? રેકોર્ડ લેવલે પહોંચ્યો

IRFC Share: ભારતીય રેલવેની લિસ્ટેડ કંપની ઈન્ડિયન રેલવે ફાઈનાન્સ કોર્પોરેશન (Indian Railway Finance Corp)નો શેર આજે 8.33 ટકાથી વધારે ઉછળીને રેકોર્ડ લેવલ પર પહોંચી ગયો હતો. કંપનીએ 2021-22માં ટેક્સ બાદ નફામાં 38 ટકાનો ઉછાળો નોંધાવતા તેનો ચોખ્ખો નફો રૂ. 6090 કરોડ થયો છે. આ શેરે આજે તેની બાવન અઠવાડિયાની હાઈ સપાટી રૂ. 34.80 નોંધાવી હતી. આ સ્ટોકની બાવન સપ્તાહની નીચી સપાટી રૂ. 19.30 છે. આ લખાય છે ત્યારે બીએસઈ પર શેર 6.60 ટકા વધીને 33.85 પર ચાલતો હતો. આજે સેન્સેક્સ 0.43 ટકા વધીને 265.25 પર ચાલતો હતો.

છેલ્લા પાંચ દિવસમાં આ શેરમાં 20 ટકાનો વધારો થયો છે. જ્યારે છેલ્લા એક મહિનામાં આ શેર 51 ટકાથી વધારે ઉછળ્યો છે. છેલ્લા છ મહિનામાં આ શેરમાં 60 ટકાનો ઉછાળો આવ્યો છે અને યર ટુ ડેટ વળતર 47 ટકા છે. છેલ્લા એક વર્ષમાં આ શેર 47 ટકા વધ્યો છે.

આઈપીઓ વખતે કેટલો ભાવ હતો
IRFC એ ભારતીય રેલવેની ફાઈનાન્સિંગ શાખા છે અને ગયા વર્ષે 18 જાન્યુઆરીથી 20 જાન્યુઆરી વચ્ચે તેનો આઈપીઓ સબસ્ક્રિપ્શન માટે ખુલ્યો હતો. આ આઈપીઓ માટે પ્રાઈસ બેન્ડ 25થી 26 રૂપિયા પ્રતિ શેર રાખવામાં આવી હતી. IRFC રેલવે મંત્રાલય હેઠચળ આવે છે અને તે ફાઈનાન્શિયલ માર્કેટમાંથી રૂપિયા ઉછીના લઈને એસેટના સર્જન અથવા એક્વિઝિશનમાં રૂપિયા લગાવે છે. ત્યારર પછી આ એસેટ્સ ભારતીય રેલવેને લિઝ પર આપવામાં આવે છે. IRFCએ હવે નાણાકીય વર્ષમાં તેના ટેક્સ બાદ નફા (PAT)માં 38 ટકાનો ઉછાળો નોંધાવ્યો છે. અગાઉના વર્ષમાં કંપનીએ 4416 કરોડનો ટેક્સ બાદ નફો નોંધાવ્યો હતો.

કંપનીએ શું કહ્યું?
IRFC હાલમાં અત્યંત સ્પર્ધાત્મક દર પર મૂડી એકત્ર કરી રહી છે. તે ડોમેસ્ટિક તથા ઓવરસિઝ ફાઈનાન્શિયલ માર્કેટમાંથી મૂડી એકઠી કરી રહી છે. તેના કારણે તેને બોરોઇંગ ખર્ચ અત્યંત નીચો રાખવામાં મદદ મળે છે. IRFCની નેટવર્થ 41,000 કરોડ રૂપિયા છે અને તેનો ફંડિગ કોસ્ટ 6.42 ટકા હતો. 2021-22માં કંપનીની કામગીરીમાંથી રેવન્યુ 28.71 ટકા વધી હતી અને રૂ. 20,298 કરોડ નોંધાઈ હતી. અગાઉના વર્ષમાં કંપનીની રેવન્યુ 15,770 કરોડ રૂપિયા રહી હતી.

રેલવેને લગતા બીજા સ્ટોક્સમાં પણ તેજીછેલ્લા એક મહિનામાં ઓછામાં ઓછા 4 રેલવે પીએસયુ સ્ટોક્સમાં બે આંકડામાં વળતર મળ્યું છે. તેમાં રેલવે વિકાસ નિગમ સૌથી વધારે 70 ટકા વધ્યો હતો. મોટા ભાગના રેલ પીએસયુ સ્ટોક સસ્તા વેલ્યૂએશન પર ટ્રેડ થતા હતા અને તેથી વધી રહ્યા છે.