ઝુનઝુનવાલાનો દાવ ઊંધો પડ્યો, હાલમાં જ ખરીદેલા શેરની કિંમત 26 ટકા ઘટી ગઈ

નવી દિલ્હી: ભારતના વોરેન બફેટ કહેવાતા રાકેશ ઝુનઝુનવાલાએ હાલમાં જ લગાવેલો એક દાવ અવળો પડ્યો છે. ઝુનઝુનવાલાએ હાલમાં જ SAILના શેર્સ ખરીદ્યા હતા, પરંતુ ગઈકાલે આ શેર તેની 52 સપ્તાહની સર્વોચ્ચ સપાટીથી 26 ટકા નીચે બંધ થયો હતો. જોકે, ટેકનિકલ એનાલિસ્ટ્સનું કહેવું છે કે શેર ઓવરસોલ્ડ ઝોનમાં છે, અને તેમાં થોડી રિકવરી નકારી શકાય તેમ નથી.આયર્ન ઓર પ્રાઈસમાં આવેલા ઘટાડાને કારણે SAIL પ્રેશરમાં જોવા મળી રહ્યો છે તેવું ફંડામેન્ટલ એનાલિસ્ટ્સ્નું માનવું છે. આગામી સમયમાં પણ તેના ભાવમાં ઓર ઘટાડો શક્ય છે. આ સરકારી કંપનીમાં ઝુનઝુનવાલાએ એપ્રિલ-જુન ક્વાર્ટરમાં 1.39 ટકા હિસ્સો ખરીદ્યો હતો. જોકે, 10મી મેના રોજ 151.10 રુપિયાની સર્વોચ્ચ સપાટીને સ્પર્શ્યા બાદ સ્ટોક સતત ઘટી રહ્યો છે.

ઝુનઝુનવાલાએ ખરીદેલા શેર્સને જો 151 રુપિયાના ભાવે ગણવામાં આવે તો તેમના રોકાણની વેલ્યૂ 640 કરોડ રુપિયા થાય છે. યસ સિક્યોરિટીઝના સિનિયર ટેકનિકલ એનાલિસ્ટ આદિત્ય અગ્રવાલનું માનવું છે કે હાલનો ટેકનિકલ ચાર્ટ જોતા સ્ટોક 101-103ના લેવલ તરફ આગળ વધી રહ્યો છે.

તેમણે એમ પણ ઉમેર્યું હતું કે સ્ટોક હાલ ઓવર સોલ્ડ ઝોનમાં છે, અને ટેકનિકલ ઈન્ડિકેટર્સ બતાવી રહ્યા છે કે તેમાં આવનારા સમયમાં શોર્ટ કવરિંગ થઈ શકે છે. જોકે, આ શેર આવનારા દિવસોમાં 116-123 રુપિયાના સ્તર સુધી પહોંચી શકે તેમ પણ તેમણે જણાવ્યું હતું.

LKP સિક્યોરિટીઝના રોહિત સિંગરે જણાવે છે કે, આ સ્ટોક માળખાગત રીતે જ નબળો લાગી રહ્યો છે, સોમવારે તેણે 110નો સપોર્ટ પણ ગુમાવ્યો હતો. આ શેર 95 રુપિયા સુધી ના પહોંચે ત્યાં સુધી તેમાં કોઈ મહત્વનો સપોર્ટ પણ નહીં દેખાય. આ શેર એકવાર 110નું લેવલ પાર કરી લે, ત્યારબાદ જ તે સેફ ઝોનમાં આવી શકશે.

આયર્ન ઓર પ્રાઈસમાં આંતરરાષ્ટ્રીય માર્કેટમાં ગયા સપ્તાહે આવેલા કડાકાને કારણે SAIL જેવી કંપનીને જોરદાર ફટકો પડ્યો છે. ICICI ડાયરેક્ટના જણાવ્યા અનુસાર, આયર્ન ઓર પ્રાઈસમાં ઘટાડો JSW સ્ટીલ જેવી કંપનીને ફાયદો કરાવી શકે છે, પરંતુ તેનાથી SAILને નુક્સાન છે.

આ ઉપરાંત, ચીનની સ્ટીલની ડિમાન્ડ પણ નબળી રહી છે. ચીનમાં હાલમાં સર્જાયેલી સંભવીત કટોકટીને કારણે પણ સ્ટીલની ડિમાન્ડમાં વધુ ઘટાડો શક્ય છે. ICICI ડાયરેક્ટે SAILને સેલનું રેટિંગ આપતા કહ્યું હતું કે, આયર્નની નીચી કિંમતથી સ્ક્રેપની કિંમત પણ નીચી જાય છે, અને તેના લીધે સ્પંજ આયર્નની કિંમત પણ ઘટે છે.