નવી કાર ખરીદવી હોય તો જલ્દી કરોઃ જાન્યુઆરીથી તમામ મોડેલના ભાવ વધી જશે

Maruti Suzuki Cars: નવી કાર ખરીદવાનો વિચાર હોય તો તમારે ઉતાવળ કરવી પડશે કારણ કે વર્ષ 2022 સમાપ્ત થતા જ નવા વર્ષમાં તમામ કારના ભાવ વધી જવાના છે. દેશની સૌથી મોટી કાર ઉત્પાદક કંપની મારુતિ સુઝુકી (Maruti Suzuki)એ જાહેરાત કરી છે કે જાન્યુઆરી 2023થી તેના તમામ મોડેલના ભાવ વધી જશે. તમામ સેક્ટરમાં થયેલા ભાવ વધારાના કારણે કારના ભાવ પણ વધારવામાં આવશે. જોકે, જાન્યુઆરીથી પોતાની કારના ભાવમાં કેટલો વધારો થશે તે જણાવ્યું નથી. મારુતિએ કહ્યું છે કે તેના દરેક મોડલમાં ભાવ વધારો પણ અલગ અલગ હશે.

ઓટો ઉત્પાદક કંપનીએ કહ્યું કે દરેક સેક્ટરમાં ભાવ વધી રહ્યા હોવાથી તેની અસર કારના ભાવ પર પણ પડશે. ચાલુ વર્ષમાં એપ્રિલ મહિનાની શરૂઆતમાં પણ મારુતિએ જુદા જુદા ઈનપુટ કોસ્ટમાં થયેલા વધારાનું કારણ આપીને કારના ભાવમાં વધારો કર્યો હતો. તે સમયે હેચબેક સ્વિફ્ટ (Maruti Swift) તથા તમામ CNG વેરિયન્ટના ભાવ વધ્યા હતા. એપ્રિલમાં મારુતિની તમામ કારના ભાવ લગભગ 1.3 ટકા વધ્યા હતા. મારુતિ દેશની સૌથી મોટી કાર ઉત્પાદક કંપની છે અને તેણે કરેલી જાહેરાત પછી બીજી કાર ઉત્પાદકો પણ ટૂંક સમયમાં ભાવવધારાની જાહેરાત કરશે તેમ લાગે છે.

દર વર્ષે જાન્યુઆરીમાં ભાવ વધારો
જાન્યુઆરી 2021 અને માર્ચ 2022 વચ્ચે કંપનીએ કારના ભાવમાં 8.8 ટકાનો વધારો થયો હતો. તેની પાછળનું કારણ એ છે કે સ્પેરપાર્ટ્સ અને કાચી સામગ્રીના ભાવમાં ઉછાળો આવ્યો છે.

મારુતિના વેચાણના આંકડા
મારુતિએ નવેમ્બર મહિનામાં તેની કારના વેચાણમાં 14.4 ટકાનો વધારો નોંધાવ્યો હતો અને તેની 1.59 લાખ કાર વેચાઈ હતી. જ્યારે ગયા નાણાકીય વર્ષના નવેમ્બર મહિનામાં તેનું વેચાણ 1.39 લાખ કાર હતું.

કારના ભાવ વધવા પાછળનું કારણભારતે જ્યારથી બીએસ-6 એમિશન ધોરણો અપનાવ્યા ત્યારથી તમામ પ્રકારના વાહનોના ભાવમાં ભારે ઉછાળો આવ્યો છે. તેમાં ટુ-વ્હીલર્સ અને ફોર વ્હીલર્સ બંને સામેલ છે. એપ્રિલ 2020થી નવા એન્જિનના ધોરણો લાગુ થયા અને વાહનોના ભાવમાં તોતિંગ વધારો થયો છે. તેનાથી ટુ વ્હીલરના ભાવમાં 3,000થી 10,000 રૂપિયાનો વધારો થયો છે જ્યારે કારના ભાવ 60 હજાર રૂપિયાથી એક લાખ રૂપિયા સુધી વધી ગયા છે.