સમગ્ર દેશમાં 5G સર્વિસ શરૂ કરવા અંગે મુકેશ અંબાણીએ કરી મોટી જાહેરાત

દેશની સૌથી મોટી કંપની રિલાયન્સ ઈન્ડસ્ટ્રીઝના ચેરમેન મુકેશ અંબાણી (RIL Chairman Mukesh Ambani) એ આજે કંપનીની એન્યુઅલ જનરલ મિટિંગમાં 5G ટેલિકોમ સર્વિસ લોન્ચ કરવા અંગે મોટી જાહેરાત કરી છે. રિલાયન્સે તાજેતરમાં જ 5G સ્પેક્ટ્રમની ખરીદી કરી છે અને દિવાળી સુધીમાં દેશના દરેક મોટા શહેરમાં 5G સર્વિસ શરૂ થઈ જવાની શક્યતા છે. ત્યાર બાદ નાના શહેરોનો વારો આવશે. મુકેશ અંબાણીએ કહ્યું કે ડિસેમ્બર 2023 સુધીમાં દરેક નાના-મોટા શહેરમાં 5G સર્વિસ લોન્ચ થશે. આજે AGMને સંબોધતા મુકેશ અંબાણીએ જણાવ્યું કે અમે 5G સર્વિસ માટે બે લાખ કરોડ રૂપિયાનું રોકાણ કર્યું છે.

રિલાયન્સ જિયો વિશ્વમાં સૌથી ઝડપથી 5G રોલઆઉટ પ્લાન સાથે સજ્જ છે. આ પ્રસંગે મુકેશ અંબાણીના પુત્ર આકાશ અંબાણીએ કહ્યું કે, 5Gમાં પુષ્કળ શક્યતા રહેલી છે જે આપણા દેશના કરોડો લોકોના જીવનમાં પરિવર્તન લાવશે. તેનાથી એગ્રીકલ્ચર, હેલ્થકેર અને એજ્યુકેશન ક્ષેત્રે ચિત્ર બદલાઈ જશે.

જિયો ક્લાઉડ PC લોન્ચ કરાશે
રિલાયન્સની AGMમાં ભવિષ્ય માટે કેટલીક યોજનાઓ જાહેર થઈ હતી જેમાંથી એક જિયો ક્લાઉડ પીસી પણ સામેલ છે. તેમાં જિયોફાઈબરનો ઉપયોગ કરીને ગ્રાહકો એક વર્ચ્યુઅલ PCનો ઉપયોગ કરી શકશે. તેના માટે કોઈ નવું રોકાણ કરવાની કે અપગ્રેડ કરવાની જરૂર નહીં પડે. પીસીનો પાવર મેળવવા માટે તે એક સુપર એફોર્ડેબલ રસ્તો છે. 5G માટે પણ જિયો તેના લેટેસ્ટ વર્ઝનનો ઉપયોગ કરાશે જે સ્ટેન્ડ-અલોન 5G તરીકે ઓળખાશે. તે 4G નેટવર્ક પર બિલકુલ આધારિત નહીં હોય.

કંપનીની રેવન્યુ 100 અબજ ડોલરનો આંક વટાવશે
મુકેશ અંબાણીએ જણાવ્યું હતું કે રિલાયન્સે તમામ બિઝનેસમાં જોરદાર વૃદ્ધિ કરી છે અને હવે કંપનીની આવક 100 અબજ ડોલરને પાર કરી જશે. રિલાયન્સની કોન્સોલિડેટેડ રેવન્યુ 47 ટકા વધીને રૂ. 7.93 લાખ કરોડને પાર કરી ગઈ છે.

ફુગાવાનાની ચિંતાથી અનિશ્ચિતતા વધીમુકેશ અંબાણીએ પોતાના વક્તવ્ય દરમિયાન વૈશ્વિક અર્થતંત્રની સમીક્ષા કરી હતી અને કહ્યું હતું કે ઉંચા ફુગાવા અને સપ્લાય ખોરવાઈ જવાના કારણે ગ્લોબલ અનિશ્ચિતતા વધી છે. પરંતુ આ દરમિયાન ભારતે વૃદ્ધિ કરી છે અને સ્થિરતા ટકાવી રાખી છે. દેશના કેટલાક ભાગોમાં આજથી જ 5G સર્વિસ લોન્ચ થશે તેમ માનવામાં આવતું હતું પરંતુ મુકેશ અંબાણીએ આ લોન્ચ દિવાળીના તહેવારો સુધી લંબાવ્યું છે.