Nykaa Share Fall: નાયકાના શેરમાં 6 ટકાથી વધારે ગાબડું, લિસ્ટિંગ પછી રોકાણકારોની 60% મૂડી ધોવાઈ ગઈ

Nykaa Share Fall: ફેશન અને કોસ્મેટિક પ્રોડક્ટ કંપની નાયકા (Nykaa)એ તાજેતરમાં રોકાણકારોને ભારે નિરાશ કર્યા છે. આજે નાયકાના શેર (FSN E-Commerce Venture)માં છ ટકાથી વધારે ઘટાડો થયો હતો અને શેર તેની 52 અઠવાડિયાની નીચી સપાટી રૂ. 975 પર પહોંચ્યો હતો. આ લખાય છે ત્યારે નાયકાનો શેર 5.13 ટકા ઘટીને રૂ. 995 પર ચાલતો હતો. નાયકાના શેરની બાવન અઠવાડિયાની ટોચ રૂ. 2573 છે. આજે આ શેર 1050 પર ખુલ્યો હતો અને ઉંચામાં રૂ. 1055 અને નીચામાં રૂ. 975 સુધી ગયો હતો. નાયકાનો IPO આવ્યો ત્યારે તેનો ઈશ્યૂ ભાવ રૂ. 1125 હતો.

નાયકાનો શેર ગયા વર્ષે ડિસેમ્બરમાં (Nykaa Listing) લિસ્ટ થયા પછી તેમાં 25 ટકા કરતા વધારે ઘટાડો થયો છે. નાયકાનો આઈપીઓ આવ્યો ત્યારે સંસ્થાકીય રોકાણકારોએ તેના શેર ખરીદવામાં ભારે રસ લીધો હતો. તેના કારણે નાયકાનો આઈપીઓ 81.78 ગણો છલકાયો હતો. આ ઓફરની પ્રાઈસ રેન્જ 1085 રૂપિયાથી 1125ની હતી.

રેકોર્ડ હાઈ પરથી શેર 60 ટકા ઘટ્યો
નાયકાનો શેર સતત ઘટાડાના કારણે 2574 પરથી લગભગ 60 ટકા જેટલો ઘટ્યો છે. નાયકાના શેરે 26 નવેમ્બર 2021ના રોજ પોતાની હાઈ પર પહોંચી ગયો હતો. નાયકાએ ચાલુ મહિનાની શરૂઆતમાં જાહેરાત કરી હતી કે તેના બોર્ડે 1ની સામે 5ના રેશિયોમાં બોનસ ઈક્વિટી શેર આપવાનો નિર્ણય લીધો છે. આ માટેની રેકોર્ડ ડેટ નવેમ્બર 2022 છે.

ધામધૂમથી લોન્ચિંગ થયું હતું
નાયકાને શેરબજારમાં લોન્ચ કરવામાં આવી ત્યારે ભારે ધામધૂમ કરવામાં આવી હતી. પરંતુ ત્યાર પછી તેની હાલત પેટીએમ જેવી થઈ ગઈ છે. મોટા ભાગની ન્યુ એજ કંપનીઓના શેર લિસ્ટિંગ વખતે ભારે આશા જગાવ્યા પછી પરફોર્મન્સ કરવામાં નિષ્ફળ રહ્યા છે. છેલ્લા ત્રણ મહિનાના આંકડા જોવામાં આવે તો કંપનીના શેરમાં 30 ટકા જેટલો ઘટાડો થયો છે. એનએસઈ પર આ શેર 79 ટકાના પ્રીમિયમ સાથે રૂ. 2018 પર લિસ્ટ થયો હતો. જ્યારે બીએસઈ પર 78 ટકાના પ્રીમિયમ સાથે આ શેરનું 2001ના ભાવે લિસ્ટિંગ થયું હતું. લિસ્ટિંગના સમયે કંપનીની માર્કેટ કેપિટલ એક લાખ કરોડને પાર કરી ગઈ હતી. પરંતુ હવે તેની માર્કેટ કેપિટલ 50 હજાર કરોડથી પણ નીચે જતી રહી છે.

20થી વધુ સેક્ટર્સની એક્સક્લુઝિવ અને ઊંડાણપૂર્વકની માહિતી મેળવવા માટે વાંચો ઈકોનોમિક ટાઈમ્સ. સબસ્ક્રાઈબ કરવા માટે ક્લિક કરો.
Disclaimer: આ લેખનો હેતુ માત્ર માહિતી આપવા માટેનો છે. કોઈપણ રોકાણ કરતા પહેલા આપના ફાઈનાન્શિયલ એડવાઈઝરની સલાહ ચોક્કસ લો.