નવી દિલ્હીઃ એક દેવાળિયું ફૂંકી ચૂકેલ ફાર્મા કંપનીના શેરમાં છેલ્લાં 4 મહિનામાં 8000 ટકાથી વધુનો ઉછાળો નોંધાઇ ચૂકયો છે. હજુ પણ શેરમાં અપર સર્કિટ (Upper Circuit)નો સિલસિલો ચાલુ છે. અહીં વાત થઇ રહી છે દેવાળિયું ફૂંકેલ કંપની ઑર્કિડ ફાર્મા લિમિટેડ (Orchid Pharma Ltd)ની.
ફાર્મા સ્ટોક Orchid Pharmaએ રિટર્ન આપવાના મામલામાં બિટકોઇનને પણ પાછળ પાડી દીધું છે. ઑર્કિડ ફાર્માના શેરે છેલ્લાં 4 મહિના દરમ્યાન 8000 ટકાનું રિટર્ન આપ્યું છે. તો આ દરમ્યાન બિટકોઇનમાં 203 ટકાનું રિટર્ન મળ્યું છે.
3 નવેમ્બર 2020ના રોજ Orchid Pharmaનો શેર સ્ટોક એક્સચેન્જમાં ફરીથી લિસ્ટેડ કરાવ્યો હતો. ત્યારબાદ કંપનીના સ્ટોક્સમાં ઘટાડો આવ્યો નથી. રીલિસ્ટિંગના દિવસથી અત્યાર સુધીમાં કંપનીના સ્ટોકમાં દરરોજ અપર સર્કિટ લાગી રહી છે. બુધવારના રોજ 10મી માર્ચના રોજ શેરમાં 5 ટકાની અપર સર્કિટ લાગી હતી અને શેર એનએસઇ પર 1307.55 રુપિયા પર બંધ રહ્યો હતો. આજે 65.35 વધીને 5 ટકાના ઉછાળા સાથે 1372.90 પર ટ્રેડ થઇ રહ્યો છે.
રીલિસ્ટિંગના સમયે 18 રુપિયા હતો કંપનીના શેરનો ભાવ
ઑર્કિડ ફાર્મા કંપનીની જ્યારે 3 નવેમ્બર 2020ના રોજ ફરી રીલિસ્ટિંગ કરાયું હતું ત્યારે શેરનો ભાવ 18 રુપિયા હતો જે 15 માર્ચ 2021ના રોજ વધીને 1441.50 રુપિયા થઇ ગયો છે. આમ જોવા જઇએ તો 128 દિવસમાં રોકાણકારોને 10000 રુપિયાના રોકાણ પર 8.55 લાખ રુપિયા થઇ ગયા હોત.
માર્કેટકેપ વધીને 5000 કરોડને પાર
ચાલુ નાણાંકીય વર્ષના ડિસેમ્બર ત્રિમાસિકમાં કંપનીની રેવન્યુ 102.63 કરોડ રુપિયા રહી અને કંપનીને 45.33 કરોડ રુપિયાની ખોટ થઇ. માર્ચ 2020માં કંપનીની રેવન્યુ 505.45 કરોડ રુપિયા હતી અને ચોખ્ખી ખોટ 149.84 કરોડ રુપિયા હતી. ચેન્નાઇ બેઝડ આ ફાર્મા કંપનીની માર્કેટ કેપ વધીને 5000 કરોડ રુપિયાથી વધુ વધી ગઇ છે.
ઑર્કિડ ફાર્મા કંપનીમાં ધનુકા લેબનો હિસ્સો 98.04 ટકા છે. આ સિવાય બીજી નાણાંકીય સંસ્થાઓનો હિસ્સો 1.19 ટકા છે. તો રિટેલ રોકાણકારોની પાસે કંપનીના માત્ર 0.5 ટકા શેર છે. કંપનીના સ્ટોક્સની આ શોર્ટેજના લીધે તેના ભાવમાં ઉછાળો આવ્યો છે.