રિલાયન્સ ઈન્ડસ્ટ્રીઝે સપ્ટેમ્બર ક્વાર્ટરમાં 13,680 કરોડનો નફો નોંધાવ્યો

મુંબઈ: રિલાયન્સ ઈન્ડસ્ટ્રીઝે સપ્ટેમ્બર ક્વાર્ટરમાં યર-ઓન-યર 43 ટકાના વધારા સાથે 13,680 કરોડ રુપિયાનો નેટ પ્રોફિટ નોંધાવ્યો છે. કંપની દ્વારા નોંધાવાયેલો પ્રોફિટ એનાલિસ્ટ જેટલી અપેક્ષા રાખી રહ્યા હતા તેનાથી વધારે છે. ઓઈલથી ટેલિકોમ સુધીના સેક્ટર્સમાં કાર્યરત રિલાયન્સની આ ક્વાર્ટરમાં આવક 48 ટકા વધીને 1.74 લાખ કરોડ પર પહોંચી છે.

કોરોનાની સેકન્ડ વેવ બાદ ઝડપથી સામાન્ય બની રહેલી આર્થિક સ્થિતિ તેમજ ગત વર્ષના આ જ ક્વાર્ટરના નીચા આંકડાને કારણે પણ કંપનીનો સપ્ટેમ્બર ક્વાર્ટરનો ગ્રોથ યર-ઓન-યર ઉંચો રહ્યો છે. કંપનીએ 30,283 કરોડ રુપિયાનો ઓપરેટિંગ પ્રોફિટ નોંધાવ્યો છે, જે ગત વર્ષના આ જ ક્વાર્ટરની સરખામણીએ 30 ટકા વધારે છે. કંપનીના ચેરમેન મુકેશ અંબાણીએ આ અંગે જણાવ્યું હતું કે, બીજા ક્વાર્ટરના આંકડા કંપનીની ક્ષમતા તેમજ વૈશ્વિકની સાથે ભારતીય અર્થતંત્રમાં જોવા મળી રહેલા સુધારાને દર્શાવે છે.

સપ્ટેમ્બર ક્વાર્ટરમાં રિલાયન્સ રિટેઈલની આવક પણ 9.2 ટકા વધીને 39,926 કરોડ પર પહોંચી છે. તેનો ઓપરેટિંગ પ્રોફિટ 45.2 ટકા વધીને 2,913 કરોડ થયો છે. જિયોએ પણ આ ગાળામાં 19,777 કરોડ રેવન્યૂ નોંધાવી છે. જ્યારે તેનો ઓપરેટિંગ પ્રોફિટ 9,294 કરોડ રુપિયા નોંધાયો છે. તેની યુઝર દીઠ આવક પણ વધીને 143.6 રુપિયા પહોંચી છે. જિયોના યુઝર્સ પણ 23.8 મિલિયનના વધારા સાાથે 429.5 મિલિયન પર પહોંચ્યા છે.