સોમવારે રિલાયન્સની AGMમાં મુકેશ અંબાણી મોટી જાહેરાત કરે તેવી શક્યતાઃ બજારના રિએક્શન પર નજર

દેશની સૌથી મોટી લિસ્ટેડ કંપની રિલાયન્સ ઈન્ડસ્ટ્રીઝ (RIL) સોમવારે તેની એન્યુઅલ જનરલ મિટિંગ (Reliance AGM) યોજશે જેમાં 5G સર્વિસ અંગે મોટી જાહેરાત થવાની શક્યતા છે. એક અંદાજ પ્રમાણે સોમવારથી જ રિલાયન્સ જિયો કદાચ 5G સર્વિસ લોન્ચ (Jio 5G launch) કરશે અને તેની સાથે 5G જિયો ફોન (Jio phone) પણ બજારમાં મુકી શકે છે. રિલાયન્સે દેશમાં 4G સર્વિસ શરૂ કરી તેની સાથે ટેલિકોમ સેક્ટરમાં એક મોટી ક્રાંતિ આવી હતી અને હવે આ ક્રાંતિનો બીજો તબક્કો શરૂ થશે તેમ માનવામાં આવે છે. સોમવારે રિલાયન્સની AGM દરમિયાન મુકેશ અંબાણી (Mukesh Ambani) પ્લેટફોર્મ પર આવશે ત્યારે તેઓ ભવિષ્ય માટે કઈ યોજના જાહેર કરે છે તેના પર બજારની નજર હશે. તેઓ રિન્યુએબલ એનર્જી બિઝનેસ માટે પણ પોતાનો પ્લાન જાહેર કરી શકે છે.

આ ઉપરાંત બીજા કેટલાક પરિબળો પણ છે જે આગામી અઠવાડિયામાં શેરબજારની દિશા નક્કી કરશે. આગામી અઠવાડિયે ઓગસ્ટ મહિનો પૂરો થશે અને ઓટો સેલ્સના આંકડા જાહેર થશે. જુલાઈ મહિનામાં ઓટો સેલ્સમાં (Auto Sales figures) સાધારણ વધારો થયો હતો. ઓટો સેલ્સના આંકડા પરથી મારુતિ સુઝુકી, ટાટા મોટર્સ, અશોક લેલેન્ડ, બજાજ ઓટો જેવી કંપનીઓના શેરની દિશા નક્કી થશે.

ગયા અઠવાડિયે ડોમેસ્ટિક ઈક્વિટી માર્કેટમાં ઘટાડો થયો હતો, પરંતુ મિડકેપ અને સ્મોલકેપ ઈન્ડેક્સ બે ટકા વધીને બંધ આવ્યા હતા. યુએસ ફેડના હોકિશ વલણના કારણે રોકાણકારો નફો બુક કરવા માટે પ્રેરાશે તેમ લાગે છે. ગયા અઠવાડિયે આઇટી સેક્ટરે સૌથી ખરાબ દેખાવ કર્યો હતો, ત્યાર પછી ફાર્માનો દેખાવ નબળો હતો. જોકે, સરકારી બેન્કો, મીડિયા અને એનર્જી સેક્ટરના શેરો વધ્યા હતા.

આગામી અઠવાડિયે ભારતના જૂન મહિનાના GDPના આંકડા જાહેર થશે. નાણાકીય વર્ષ 2023ના પ્રથમ ક્વાર્ટરમાં ભારતીય અર્થતંત્ર 15.1 ટકાના દરે ગ્રોથ કરે તેવી શક્યતા છે. ભારતમાં હવે એફઆઈઆઈએ ફરીથી ખરીદી શરૂ કરી છે. ગયા અઠવાડિયામાં વિદેશી સંસ્થાકીય રોકાણકારોએ ફાઈનાન્શિયલ, કેપિટલ ગૂડ્સ, એફએમસીજી અને ટેલિકોમ સેક્ટરના શેરો ખરીદ્યા હતા. ડોલરની મજબૂતી વચ્ચે એફઆઈઆઈની ખરીદી વધી છે તે દર્શાવે છે કે ભારતીય અર્થતંત્રમાં તેઓ ભરોસો ધરાવે છે. આગામી અઠવાડિયે અમેરિકામાં જોબલેસ ક્લેમનો ડેટા જાહેર થશે જેના પર વિશ્વભરના બજારોની નજર હશે. જોબલેસ ક્લેમ અને ફુગાવાના આધારે અમેરિકન સરકાર તેની વ્યાજદરની નીતિ નક્કી કરશે. આગામી અઠવાડિયે નિફ્ટી માટે 17400ની સપાટી બ્રેક લેવલ તરીકે કામ કરી શકે છે. બજારમાં અપસાઈડ મર્યાદિત રહી શકે છે.