રિલાયન્સનું રિફાઈનિંગ માર્જિન નવો રેકોર્ડ બનાવશેઃ શેરમાં જોરદાર ઉછાળો શક્ય

રિલાયન્સ ઇન્ડસ્ટ્રીઝ (Reliance Industries) હાલમાં રિફાઈનિંગ માર્જિન (RIL Refining Margin)ના મોરચે અત્યંત સારો દેખાવ કરી રહી છે અને તે વિક્રમજનક માર્જિન હાંસલ કરે તેવી શક્યતા છે. તેના કારણે બ્રોકરેજિસ આ સ્ટોક માટે ઉત્સાહિત છે અને તેને 'બાય' રેટિંગ આપ્યું છે. રિલાયન્સનો શેર હાલની સપાટીએથી લગભગ 33 ટકા સુધી વધવાની શક્યતા છે. બર્નસ્ટેને તેની લેટેસ્ટ નોટમાં જણાવ્યું છે કે રિલાયન્સ ઈન્ડસ્ટ્રીઝનું રિફાઈનિંગ માર્જિન વધીને 25.5 ડોલર પ્રતિ બેરલ થવાની શક્યતા છે જે એક રેકર્ડ હશે. આ ઉપરાંત ટેરિફ વધારવાના કારણે રિલાયન્સ જિયો (Reliance Jio)નું રિઝલ્ટ સુધરશે. ઈ-કોમર્સના બિઝનેસમાં વેગના કારણે રિલાયન્સ રિટેલ (Reliance Retail) પણ ફાયદામાં રહેશે.

બર્નસ્ટેને રિલાયન્સ ઇન્ડસ્ટ્રીઝ માટેનો ટાર્ગેટ ભાવ (RIL Target price) રૂ. 2830થી વધારીને રૂ. 3360 કર્યો છે. એટલે કે હાલના ભાવની સરખામણીમાં રિલાયન્સમાં લગભગ 33 ટકાનો ઉછાળો આવી શકે છે.

બુધવારે રિલાયન્સનો શેર ઘટીને ખુલ્યો હતો, પરંતુ તેમાં તરત રિકવરી આવી હતી અને તે રૂ. 2550 પર ચાલતો હતો. રિલાયન્સ ઈન્ડસ્ટ્રીઝનું રિફાઈનિંગ માર્જિન અસામાન્ય છે અને ઓઈલ-ટુ-કેમિકલ બિઝનેસમાં વિસ્તરણથી તેને ફાદો થશે.

Bernsteinના અંદાજ અનુસાર નાણાકીય વર્ષ 2023માં રિલાયન્સને Ebitda રૂ. 1.76 લાખ કરોડ નોંધાશે એટલે કે ગયા વર્ષના Ebitdaની તુલનામાં તેમાં 48 ટકા વધારો થશે. નાણાકીય વર્ષ 2023 પછી રિલાયન્સનો ડિજિટલ અને રિટેલ બિઝનેસ ઝડપથી ગ્રોથ કરશે જેના કારણે ઓઈલ ટુ કોમર્સનો Ebitda યોગદાન ઘટીને કુલ Ebitdaના 20થી 30 ટકા થઈ જશે. રિલાયન્સ ઈન્ડસ્ટ્રીઝ તેના એનર્જી બિઝનેસમાં નવી વ્યૂહરચના ધરાવે છે તેને ધ્યાનમાં રાખતા નાણાકીય વર્ષ 2026માં તેના Ebitda કન્ટ્રીબ્યુશનમાં લગભગ 10 ટકાનો વધારો થવાની શક્યતા છે.

તાજેતરમાં જે પી મોર્ગને પણ રિલાયન્સના શેરને બાય રેટિંગ આપીને ખરીદવાની ભલામણ કરી હતી. જેપી મોર્ગને જણાવ્યું કે ભારતમાં અત્યારે બહુ ઓછી એવી કંપનીઓ છે જે પોઝિટિવ અર્નિંગ રિવિઝન સાઈકલ ધરાવે છે. રિલાયન્સ આવી જ એક કંપની છે. તેનું કારણ છે કે હાલમાં રિફાઈનિંગ અને ગેસ બિઝનેસ માટે અત્યંત અનુકુળ સ્થિતિ છે. રિફાઈનિંગ અને અપસ્ટ્રીમ ગેસ બિઝનેસના અર્નિંગ આઉટલૂકમાં સુધારો તથા નોન-એનર્જી અથવા કન્ઝ્યુમર બિઝનેસમાં મજબૂત વેલ્યૂએશન આ અપગ્રેડમાં મુખ્ય ભૂમિકા ભજવશે.

20થી વધુ સેક્ટર્સની એક્સક્લુઝિવ અને ઊંડાણપૂર્વકની માહિતી મેળવવા માટે વાંચો ઈકોનોમિક ટાઈમ્સ. સબસ્ક્રાઈબ કરવા માટે ક્લિક કરો.
Disclaimer: આ લેખનો હેતુ માત્ર માહિતી આપવા માટેનો છે. કોઈપણ રોકાણ કરતા પહેલા આપના ફાઈનાન્શિયલ એડવાઈઝરની સલાહ ચોક્કસ લો.