RIL ગિગા ફેક્ટરીઓ સ્થાપવા સજ્જઃ કેલિફોર્નિયાની સોફ્ટવેર કંપની SenseHawk ખરીદશે

દેશની સૌથી મોટી પ્રાઈવેટ કંપની રિલાયન્સ ઇન્ડસ્ટ્રીઝ કેલિફોર્નિયાની એક સોફ્ટવેર કંપની સેન્સહોક (SenseHawk)ને 3.2 કરોડ ડોલરમાં ખરીદવાની છે જે સોલર આધારિત મેનેજમેન્ટ ટૂલ્સ સાથે સંકળાયેલી છે. સેન્સહોકની સ્થાપના 2018માં થઈ હતી અને તે શરૂઆતના તબક્કાનું સ્ટાર્ટઅપ છે. રિલાયન્સે તેમાં લગભગ 80 ટકા હિસ્સો ખરીદવા વાતચીત શરૂ કરી છે. સેન્સહોક સોલર પ્રોજેક્ટને ઝડપથી આગળ વધારવામાં અને તેની પ્રોસેસ તથા ઓટોમેશનના ઉપયોગને સ્ટ્રીમલાઈન કરવામાં મદદ કરે છે. તે એન્ડ-ટુ-એન્ડ સોલર એસેટ લાઈફસાઈકલના મેનેજમેન્ટ માટે સોલર ડિજિટલ પ્લેટફોર્મ પૂરું પાડે છે. 2022માં સેન્સહોકનું ટર્નઓવર 2,326,369 ડોલર, 2021માં 1,165,926 ડોલર અને 2020માં 1,292,063 ડોલર હતું તેમ રિલાયન્સ ઈન્ડસ્ટ્રીઝે જણાવ્યું હતું.

રિલાયન્સને આ ડીલથી શું ફાયદો થશે
અબજોપતિ ઉદ્યોગપતિ મુકેશ અંબાણી (RIL Chairman Mukesh Ambani)ની કંપની રિલાયન્સ ઇન્ડસ્ટ્રીઝે જણાવ્યું કે આ ડીલથી કસ્ટમર્સને વધારે વેલ્યૂ પૂરી પાડી શકાશે. તેઓ કસ્ટમર્સ માટે યુનિક અને નવા સોલ્યુશન વિકસાવી શકશે. આ ડીલ રિલેટેડ પાર્ટી ટ્રાન્ઝેક્શનમાં આવતી નથી. રિલાયન્સના કોઈ પણ પ્રમોટર અથવા ગ્રૂપ કંપની સેન્સહોકમાં કોઈ હિસ્સો ધરાવતી નથી. આ ટ્રાન્ઝેક્શન અમુક રેગ્યુલેટરી અને કસ્ટમરી ક્લોઝિંગ શરતોને આધિન છે અને તેને 2022ના અંત સુધીમાં પૂર્ણ કરવામાં આવશે.

મુકેશ અંબાણીની રિલાયન્સ ઈન્ડસ્ટ્રીઝ હાલમાં ઝડપથી વિસ્તરણ કરી રહી છે અને તે દાયકાઓથી પેટ્રોકેમિકલ, ઓઈલ અને ગેસ બિઝનેસમાં છે. તાજેતરમાં તેણે ટેલિકોમ અને રિટેલ સેક્ટરમાં પણ આક્રમક કામગીરી કરી છે. રિલાયન્સની લગભગ 60 ટકા જેટલી આવક ઓઈલ રિફાઈનિંગ અને પેટ્રોકેમિકલ્સમાંથી આવે છે. જોકે, હવે તે રિટેલ, ટેલિકોમ્યુનિકેશન અને ટેક્નોલોજીમાં ડાઈવર્સિફિકેશન કરીને ઓઈલ-ગેસ પર પોતાનો આધાર ઘટાડવા માંગે છે.

રિલાયન્સના અન્ય સાહસમુકેશ અંબાણી હાલમાં ગ્રીન એનર્જી (Green Energy) પર વધારે ફોકસ કરી રહ્યા છે જેમાં સોલર પાવરનો પણ સમાવેશ થાય છે. કંપની આગામી 10થી 15 વર્ષમાં રિન્યુએબલ એનર્જીમાં 80 અબજ ડોલરનું રોકાણ કરશે અને પોતાનું નવું રિફાઇનરી કોમ્પ્લેક્સ તૈયાર કરશે. આ ઉપરાંત રિલાયન્સ જૂથ ધીરુભાઈ અંબાણી ગ્રીન એનર્જી ગિગા કોમ્પ્લેક્સ ખાતે ચાર ગિગા ફેક્ટરીઓ સ્થાપી રહ્યું છે, જ્યાં સોલર પેનલ, એનર્જી સ્ટોરેજ સિસ્ટમ, ઈલેક્ટ્રોલાઈટ્સ અને ફ્યુઅલ સેલ્સનું ઉત્પાદન કરવામાં આવશે. આ ફેક્ટરીઓ જામનગર પાસે 5,000 એકરમાં ફેલાયેલી હશે. ગયા અઠવાડિયે રિલાયન્સ ઈન્ડસ્ટ્રીઝની 45મી વાર્ષિક સામાન્ય સભામાં કંપનીના ચેરમેન અને મેનેજિંગ ડિરેક્ટર મુકેશ અંબાણીએ પાવર ઇલેક્ટ્રોનિક્સ માટે નવી ગિગા ફેક્ટરી સ્થાપવાની જાહેરાત કરી હતી.