અજાણી લિંક પરની એક ક્લિક ઉડાવી શકે છે તમારી કમાણી, SBIએ આપી આ ચેતવણી

નવી દિલ્હી: ઈન્ટરનેટના કારણે લોકોનું જીવન સરળ થઈ ગયું છે પણ તેની સાથે કેટલીક મુશ્કેલીઓ પણ સંકળાયેલી છે. ઓનલાઈન હોવ ત્યારે કોઈપણ અજાણી લિંક પર ક્લિક કરવાનું ભારે પડી શકે છે. તમારી માત્ર એક ક્લિકથી તમામ કમાણી ખાતામાંથી ઉડી શકે છે. દેશની સૌથી મોટી સરકારી બેંક SBI (State Bank of India)એ કરોડો ગ્રાહકોને ચેતવણી આપી છે કે કોઈપણ અજાણી લિંક પર ક્લિક કરશો નહીં. આવું કરવાથી તમે પોતાની મહેનતની કમાણીને ગુમાવી શકો છો.

SBIએ તેના ગ્રાહકોને એવી એપથી પણ સાવધાન રહેવાનું જણાવ્યું છે કે જે તાત્કાલિક લોન આપે છે. SBIએ કહ્યું કે આવી રીતે તાત્કાલિક અને ઝડપી લોન લેવાનું ભારે પડી શકે છે. બેંકે કસ્ટમર્સને કહ્યું કે આવી કોઈ એપના ચક્કરમાં પડશો નહીં. આવી તાત્કાલિક લોન આપતી એપના કારણે તમને ભારે નુકસાન થઈ શકે છે. આ એપ લોકોને મિનિટોમાં લોન અપવાના બહાના આપીને પોતાના ચક્કરમાં ફસાવે છે અને તેમના ઊંચા દર પર લોન આપે છે. આ એપ આશરે 35 ટકાના દર પર લોન આપે છે.

આવી તાત્કાલિક લોન એપથી આ રીતે બચો

SBIએ આવી ઈન્સ્ટન્ટ એટલે કે તાત્કાલિક લોનની જાળમાં ફસાવાથી બચવા માટેની ટિપ્સ પણ જણાવી છે. SBIના જણાવ્યા મુજબ લોન લેતા પહેલા નિયમ અને શરતો સારી રીતે જાણી લો. કોઈપણ શંકાસ્પદ લિંક પર ક્લિક કરતા બચવું જરૂરી છે. ડાઉનલોડ કરતા પહેલા એપની પ્રમાણિકતા ચેક કરી લો. SBIએ સાથે એવું પણ જણાવ્યું કે ગ્રાહક પોતાની તમામ નાણાકીય જરૂરિયાતો માટે https://bank.sbiની મદદ લઈ શકે છે.

ઈન્સ્ટન્ટ એટલે કે તાત્કાલિક લોન આપતી આ એપ પ્રોસેસિંગના નામે તગડી ફી વસૂલે છે. SBIએ વધુમાં જણાવ્યું કે પોતાની પર્સનલ માહિતી કોઈની પણ સાથે શેર કરવી જોઈએ નહીં. આવું કરવાથી કસ્ટમર્સના ખાતામાં જમા રકમ ઉડી શકે છે. SBIએ કહ્યું કે પોતાનો એટીએમ પિન, કાર્ડ નંબર, અકાઉન્ટ નંબર અને ઓટીપી ક્યારેય પણ કોઈની સાથે શેર કરશો નહીં.