સેન્સેક્સનો સપાટોઃ બે મહિનામાં 9250 પોઈન્ટ વધ્યો, મંદીવાળા ટાઢાબોળ

Share Market Recovery: બે મહિનામાં શેરબજારનું આખું ચિત્ર બદલાઈ ગયું છે. અમેરિકામાં મંદી આવશે તેવી બીકે બે મહિના અગાઉ બજાર રોજે રોજ ઘટતું જતું હતું, પરંતુ ત્યાર બાદ માત્ર 60 દિવસમાં જોરદાર રિકવરી કરી છે અને સેન્સેક્સમાં 9250નો વધારો જોવા મળ્યો છે. મહત્ત્વની વાત એ છે કે માર્કેટનો ઉછાળો વ્યાપક છે અને સેન્સેક્સના 30 શેરોમાંથી 13 શેરમાં 20 ટકા કરતા વધારે ઉછાળો આવ્યો છે. આજથી બે મહિના અગાઉ BSE સેન્સેક્સ 50,921ની એક વર્ષની નીચી સપાટીએ હતો. ત્યાંથી તે લગભગ 9250 પોઈન્ટ અથવા 18.15 ટકા વધ્યો છે. તેમાંથી 13 શેરમાં તો 20 ટકાથી લઈને 35 ટકા જેટલો વધારો થયો છે. અમેરિકન ઇકોનોમી અને ફુગાવા અંગે સમગ્ર વિશ્વમાં ચિત્ર બદલાઈ રહ્યું છે જેના કારણે સેન્સેક્સ અને નિફ્ટી સતત વધી રહ્યા છે.

બુધવારે સેન્સેક્સ 60,000ને પાર કરીને આ લખાય છે ત્યારે 60,219 પર પહોંચ્યો હતો. અમેરિકન અર્થતંત્ર નરમ પડશે પરંતુ તે હાર્ડ લેન્ડિંગ નહીં હોય તેમ માનવામાં આવે છે. આ ઉપરાંત યુએસ ફેડ દ્વારા રેટ વધારવાની ઝડપ પણ ઘટશે તેવી માન્યતા છે. કંપનીઓના અર્નિંગના આંકડા પણ ખાસ ડાઉનગ્રેડ કરવામાં આવ્યા નથી. તેથી બજારમાં ફરી આશાવાદનો સંચાર થયો છે.

કયા શેરોમાં તેજી છે?
સેન્સેક્સના સ્ટોક્સની વાત કરીએ તો 17 જૂનથી અત્યાર સુધીમાં એશિયન પેઈન્ટ્સ (Asian Paints)નો શેર સૌથી વધુ 35.47 ટકા વધીને રૂ. 3499 થયો છે જે બે મહિના અગાઉ રૂ. 2583 પર હતો. આમ છતાં 2022માં આઠ મહિનામાં તેણે કોઈ વળતર આપ્યું નથી. ક્રૂડ અને ક્રૂડના ડેરિવેટિવ્ઝના ભાવ ઘટી રહ્યા હોવાથી એશિયન પેઈન્ટ્સે અપેક્ષા કરતા સારું રિઝલ્ટ આપ્યું છે.

બે મહિનાના ગાળામાં બજાજ ફિનસર્વ (Bajaj Finserv)નો શેર પણ 35 ટકા કરતા વધારે વધ્યો છે અને 11758થી વધીને રૂ. 15914 થયો છે. આ કંપનીએ નાણાકીય વર્ષ 2023ના ઇપીએસ અંદાજમાં 8.8 ટકાનો કુદકો નોંધાવ્યો છે. આ ઉપરાંત અન્ય વધનારા મોટા શેરોમાં ઈન્ડસઈન્ડ બેન્કનો સમાવેશ થાય છે જે બે મહિનામાં 34.36 ટકા વધ્યો છે. બે મહિના અગાઉ આ શેરનો ભાવ રૂ. 806 હતો જે હવે વધીને રૂ. 1084.53 થયો હતો. નાણાકીય વર્ષ 2023 અને 2024માં આ બેન્કના અર્નિંગના અંદાજમાં સાધારણ ડાઉનગ્રેડ જોવા મળ્યું છે. જૂન ક્વાર્ટરમાં આ પ્રાઈવેટ સેક્ટરની કંપનીએ 1631 કરોડનો ચોખ્ખો નફો નોંધાવ્યો હતો.

સેન્સેક્સના અન્ય સ્ટોક્સની વાત કરીએ તો બે મહિનાની અંદર બજાજ ફાઈનાન્સ (Bajaj Finance), મહિન્દ્રા એન્ડ મહિન્દ્રા, ટાઈટન કંપની, અલ્ટ્રાટેક સિમેન્ટ, ICICI Bank અને હિદુસ્તાન યુનિલિવરના શેરમાં 25થી 29 ટકાનો વધારો થયો છે. આ સ્ટોક્સ પૈકી બજાજ ફાઈનાન્સના ઈપીએસ અંદાજમાં 1.7 ટકાનો વધારો થયો છે. ટાટા સ્ટીલ, એલ એન્ડ ટી, એચડીએફસી અને એક્સિસ બેન્કના શેરમાં બે મહિનામાં 20થી 25 ટકાનો વધારો થયો છે.