આ સ્મોલકેપ સ્ટોકે ત્રણ મહિનામાં 80% કમાણી કરાવીઃ હવે 1000% ડિવિડન્ડ આપશે

સ્મોલકેપ કંપની બેન્કો પ્રોડક્ટ્સ (Banco Products)નો શેર તાજેતરમાં તેના જોરદાર રિટર્નના કારણે ચર્ચામાં છે. આ કંપની ઓટો એન્સિલરી પ્રોડક્ટનું ઉત્પાદન કરે છે અને છેલ્લા ત્રણ મહિનામાં તેણે 80 ટકા વળતર આપ્યું છે. હવે આ શેરે બે રૂપિયાની મૂળ કિંમત સામે 20 રૂપિયાના ડિવિડન્ડની જાહેરાત કરી છે. એટલે કે આ શેર તેની ફેસ વેલ્યૂની તુલનામાં 1000 ટકા ડિવિડન્ડ આપી રહ્યો છે. સ્મોલ કેપ કંપની Banco Productsના બોર્ડ ઓફ ડિરેક્ટર્સે ફાઈનલ ડિવિડન્ડની ચુકવણી માટે 7 સપ્ટેમ્બર 2022ની તારીખ નક્કી કરી છે. કંપનીના શેરહોલ્ડર્સ માટે આ બહુ ફાયદાકારક જાહેરાત છે કારણ કે તેઓ છેલ્લા ત્રણ મહિનામાં પહેલેથી 80 ટકા ફાયદો કમાઈ ચુક્યા છે.

કંપનીએ શેરબજારને જણાવ્યું કે બોર્ડ ઓફ ડિરેક્ટર્સે બે રૂપિયાના શેર સામે 20 રૂપિયા ડિવિડન્ડ (1000 ટકા) ચુકવવાનો નિર્ણય લીધો છે. ઓટો એન્સિલરી કંપનીએ 15 સપ્ટેમ્બર 2022ને કટ-ઓફ ડેટ નક્કી કરી છે જેથી શેરહોલ્ડરો પોતાના રાઈટ્સનો ઉપયોગ કરીને વોટિંગ કરી શકે. 6 સપ્ટેમ્બર 2022થી આ સ્મોલકેપ ઓટો એન્સિલરી સ્ટોક એક્સ-ડિવિડન્ડ થશે.

શેર ક્યાંથી ક્યાં પહોંચી ગયો?
છેલ્લા ત્રણ મહિનાથી બેન્કો પ્રોડક્ટનો શેર અપટ્રેન્ડમાં છે અને આ ઓટો એન્સિલરી કંપનીનો શેર રૂ. 125થી વધીને રૂ. 225 થયો છે. એટલે કે આ ગાળામાં તેમાં 80 ટકાનો વધારો થયો છે. શુક્રવારે બજાર બંધ થયું ત્યારે બેન્કો પ્રોડક્ટની માર્કેટ કેપિટલ રૂ. 1611 કરોડ હતી જ્યારે શુક્રવારે તેનું ટ્રેડ વોલ્યુમ 10.90 લાખ હતું. એવરેજ ટ્રેડ વોલ્યુમ 2.89 લાખની તુલનામાં તેના વોલ્યુમમાં ઘણો વધારો થયો છે. NSE પર તેની બાવન સપ્તાહની ઊંચી સપાટી રૂ. 229.35 છે જ્યારે 52 અઠવાડિયાની નીચી સપાટી રૂ. 118 છે.

આ શેર શુક્રવારે 2.98 ટકા વધીને રૂ. 224.95 પર બંધ આવ્યો હતો. છેલ્લા એક મહિનામાં આ શેર 22.30 ટકા જેટલો વધ્યો છે જ્યારે છ મહિનામાં આ શેરમાં 51 ટકાનો વધારો થયો છે. આ સ્ટોકમાં યર ટુ ડેટ વળતર 27 ટકા છે જ્યારે એક વર્ષમાં આ શેર 19.88 ટકા વધ્યો છે. પાંચ વર્ષના ગાળામાં આ સ્ટોકે 4.31 ટકા રિટર્ન આપ્યું છે. ગયા અઠવાડિયામાં બીએસઈ સેન્સેક્સ 183.37 પોઈન્ટ વધ્યો હતો જ્યારે નિફ્ટીમાં 60 પોઈન્ટનો વધારો થયો હતો. સપ્તાહ દરમિયાન સેન્સેક્સે 60,000ની સપાટી વટાવી હતી અને નિફ્ટી પણ 18,000ને પાર કરી ગયો હતો.