સુપરડુપર હિટ સ્ટોકઃ માત્ર એક લાખના રોકાણ સામે ઈન્વેસ્ટરોને પાંચ કરોડથી વધારે કમાણી થઈ

Multibagger Share: શેરબજારના રોકાણકારો બ્લૂચિપ કંપનીઓના શેર ખરીદતા રહે તો પણ ક્યારેક તેમને જોઈએ તેટલો નફો નથી મળતો. પરંતુ તેની સામે કેટલાક મલ્ટિબેગર શેર એવા છે જેણે મૂડીને અનેકગણી કરી આપી છે અને લાખોપતિઓને કરોડોપતિ બનાવી દીધા છે. પ્રાજ ઈન્ડસ્ટ્રીઝ (Praj Industries) પણ આવો જ એક શેર છે, જેમાં એક લાખના રોકાણ સામે 23 વર્ષમાં 5.06 કરોડ મળ્યા છે. મહત્ત્વની વાત એ છે કે 23 વર્ષ અગાઉ આ શેરનો ભાવ માત્ર એક રૂપિયાથી નીચો હતો જે હવે વધીને રૂ. 389 થયો છે.

પ્રાજ ઈન્ડસ્ટ્રીઝ વિશે
પ્રાજ ઈન્ડસ્ટ્રીઝ (Praj Industries) એક મિડકેપ કંપની છે અને ઈન્ડસ્ટ્રીયલ સેક્ટર તેના ફોકસમાં છે. આ કંપની રૂ. 7170.60 કરોડની માર્કેટ કેપિટલ ધરાવે છે. પ્રાજ ઈન્ડસ્ટ્રીઝ બ્રુઅરીઝ, હાઈ પ્યોરિટી વોટર, ક્રિટિકલ પ્રોસેસ ઈક્વિપમેન્ટ, બાયોએનર્જીના ક્ષેત્રમાં પર્યાવરણને નુકસાન ન થાય તેવા સોલ્યુશન વિકસાવે છે. હાલમાં આ કંપની પાંચ ખંડમાં 100થી વધુ દેશોમાં હાજરી ધરાવે છે. તેના ક્લાયન્ટમાં અદાણી સોલર, ઈન્ડિયન ઓઈલ, હેઈનિકેન, દીપક ફર્ટિલાઈઝર, સેબ મિલર, બજાજ હિંદુસ્તાન, યુબી ગ્રૂપ, બાયોકોન, પ્રોક્ટર એન્ડ ગેમ્બલ, રેનબેક્સી, લુપિન, બીએએસએફનો સમાવેશ થાય છે. વેલ્યૂ રિસર્ચના એનાલિસિસ પ્રમાણે પ્રાજ ઈન્ડસ્ટ્રીઝ એ દેવામુક્ત કંપની છે અને 23 વર્ષના ગાળામાં તેના રોકાણકારોને કરોડોપતિ બનાવ્યા છે.

શુક્રવારે Praj Industries નો શેર રૂ. 389 પર બંધ આવ્યો હતો અને અગાઉના બંધની સામે 3.59 ટકા વધ્યો હતો. 1 જાન્યુઆરી 1999ના રોજ આ શેરનો ભાવ માત્ર 77 પૈસા હતો. એટલે કે આટલા વર્ષોમાં આ સ્ટોક 50,529 ટકા વધ્યો છે. તમે આ શેરમાં એક લાખ રૂપિયા રોક્યા હોત તો બે દાયકામાં તમે પાંચ કરોડથી વધારે રૂપિયાના માલિક હોત. આ શેરનો ભાવ સપ્ટેમ્બર 2017માં 67 રૂપિયા હતો અને છેલ્લા પાંચ વર્ષમાં આ શેરે 477 ટકાથી વધારે વળતર આપ્યું છે.

છેલ્લા 12 મહિનાની વાત કરવામાં આવે તો આ શેરમાં 20.14 ટકાનો વધારો થયો છે અને યર ટુ ડેટ વળતર 15.44 ટકા છે. એનએસઈ પર આ શેર ફેબ્રુઆરીમાં 448ની ટોચ પર પહોંચ્યો હતો જ્યારે તેની બાવન સપ્તાહની નીચી સપાટી રૂ. 289 છે જે મે 2022માં નોંધાઈ હતી. એટલે કે આ શેર તેની બાવન સપ્તાહની નીચી સપાટીએથી 35 ટકા વધ્યો છે જ્યારે બાવન સપ્તાહની ઉંચી સપાટી પરથી શેરમાં 13 ટકાનો ઘટાડો થયો છે.

હજુ શેર શા માટે વધશેપ્રાજ ઈન્ડસ્ટ્રીઝના શેરમાં હજુ પણ વધારો ચાલુ રહેવાની શક્યતા છે કારણ કે ડોમેસ્ટિક ઈથેનોલ પ્લાન્ટમાં આ કંપની લીડરશિપ ધરાવે છે. તે 100થી વધારે દેશોમાં હાજરી ધરાવે છે અને તેની પાસે ફ્યુચર રેડી ટેક્નોલોજી છે.