પ્રતિબંધના કારણે ટિકટોકની કંપની બાઈટડાન્સે ભારતમાં તેના વર્કફોર્સમાં કર્યો ઘટાડો

નવી દિલ્હીઃ ભારતમાં લોકપ્રિય બનેલી વિડીયો શેરિંગ એપ ટિકટોક પર સરકાર દ્વારા ઘણા મહિના અગાઉ પ્રતિબંધ લગાવી દેવામાં આવ્યો છે. સરકારે ઘણી બધી ચાઈનિઝ એપ પર પ્રતિબંધ લગાવ્યો હતો જેમાં ટિકટોક પણ સામેલ છે. હવે ટિકટોક એપની કંપની બાઈટડાન્સે ભારતમાં તેના કેટલાક કર્મચારીઓને છૂટા કરી દીધા છે. કંપનીએ બુધવારે તેના કર્મચારીઓને ઈન્ટરનલ મેમો આપ્યો હતો જેમાં તેણે કહ્યું હતું કે કંપનીને ખબર નથી કે ભારતમાં તે ક્યારે કમબેક કરશે.

સરકાર દ્વારા આ મહિને ટિકટોક સહિત અન્ય 58 ચાઈનિઝ એપ પરનો પ્રતિબંધ યથાવત રાખવાનો નિર્ણય લેવામાં આવ્યો હતો. ભારત અને ચીન વચ્ચે ગત વર્ષથી લદાખ સરહદે તણાવ ચાલી રહ્યો છે. ત્યારબાદ સરકાર દ્વારા ગત વર્ષે ઘણી બધી ચાઈનિઝ એપ પર પ્રતિબંધ લગાવી દેવામાં આવ્યો હતો.

મીડિયા એજન્સીના જણાવ્યા પ્રમાણે બાઈટડાન્સે તેના મેમોમાં તેણે લખ્યું છે કે, અમે આશા રાખતા હતા કે પરિસ્થિતિ થાળે પડી જશે. ભારતમાં અમારી એપ પર પ્રતિબંધ છે તેથી અમે ફૂલ સ્ટાફ રાખી શકીએ નહીં. અમને ખબર નથી કે અમે ભારતમાં ક્યારે પાછા ફરીશું.

કંપનીએ પોતાના નિવેદનમાં જણાવ્યું હતું કે, તેના તમામ પ્રયાસો છતાં તેને પ્રતિબંધ ઉઠાવવામાં સફળતા મળી નથી. જોકે, કેટલા કર્મચારીઓ પોતાની નોકરી ગુમાવશે તેનો ચોક્કસ આંકડો જાહેર કરવામાં આવ્યો નથી. પ્રતિબંધ અગાઉ ટિકટોક ભારતની સૌથી લોકપ્રિય વિડીયો શેરિંગ એપ હતી અને 2019મા બાઈટડાન્સ દ્વારા ભારતમાં 1 બિલિયન ડોલરનું રોકણ કરવાની યોજના બનાવવામાં આવી હતી.

ફક્ત ભારત જ નહીં અન્ય કેટલાક દેશોમાં પણ ટિકટોક સામે સવાલો ઉઠ્યા હતા. ટ્રમ્પ વહિવટી તંત્ર દ્વારા ટિકટોક પર પ્રતિબંધ મૂકવામાં આવ્યો હતો. જ્યારે ઓસ્ટ્રેલિયામાં પણ તેની સામે સવાલ થયા હતા. ટિકટોક સામે ડેટા પ્રાઈવસીને લઈને સવાલો ઉઠી રહ્યા છે.