'ગુમ' હોવાનું મનાતા જેક માની એક ઝલકથી અલીબાબાને થયો અબજોનો ફાયદો

નવી દિલ્હી: ચીનના દિગ્ગજ ઉદ્યોગપતિ જેક મા લાંબા સમય પછી બુધવારે જાહેરમાં દેખાયા હતા. તેમનો એક મિનિટથી પણ ઓછા સમયનો વિડીયો સામે આવ્યો અને આ દરમિયાન તેઓ ચીનની સરકાર વિશે કંઈ ન બોલ્યા. ચીનની સરકારની કાર્યવાહીથી તેમનો બિઝનેસ સંકટમાં આવી ગયો હતો, પરંતુ મહિનાઓથી જેક માની એક એક ઝલક મેળવવા ઈચ્છતા રોકાણકારોમાં ઉત્સાહ ભરવા માટે આ પૂરતું હતું.

જેક માએ બુધવારે એક લાઈવ સ્ટ્રીમિંગ વિડીયો કોન્ફ્રન્સમાં ભાગ લીધો. બસ પછી તો શું હતું અલીબાબા ગ્રુપ હોલ્ડિંગ લિમિટેની માર્કેટ વેલ્યુ એક જ દિવસમાં 58 અબજ ડોલર વધી ગઈ. જેક મા ગત વર્ષના અંતથી ગુમ હતા અને તેમના વિશે ઘણી અટકળો લગાવાઈ રહી હતી. ચીનના સૌથી ફેમસ બિઝનેસમેનના ભવિષ્ય વિશે હજુ વધારે સ્પષ્ટ ચિત્ર સામે નથી આવ્યું.

પરંતુ, વિશ્લેષકોનું માનવું છે કે, બુધવારના વિડીયોએ એ વાતના સંકેત આપ્યા છે કે, જેક મા જેલમાં હોવાની કે સરકારે તેમની કંપનીઓ ટેકઓવર કરી હોવાની આશંકાઓનો અંત આવી ગયો છે. જેક માએ સરકારની મંજૂરીથી જ આ કોન્ફ્રન્સમાં ભાગ લીધો હશે. ચીનના સરકારી ન્યૂઝ પેપર ગ્લોબલ ટાઈમ્સે પણ તેના વિશે સ્ટોરીઝ ચલાવી હતી. જેક મા જાહેરમાં દેખાયા બાદ અલીબાબાના શેર્સમાં બુધવારે 8.5 ટકાની તેજી આવી અને અલીબાબાની માર્કેટ કેપ 58 અબજ ડોલર વધી ગઈ.

ચાઈનીઝ યુનિવર્સિટી ઓફ હોંગકોંગના પ્રોફેસર ફંગ કેચેંગે કહ્યું કે, સરકારના આગામી પગલાંને લઈને કંઈપણ કહી શકાય તેમ નથી. પરંતુ, જેક માના વિડીયોથી સ્પષ્ટ છે કે, તેમની સ્થિત આશંકાઓ કરતા ઘણી સારી છે. જેક માએ દેશના 'લાંચિયા' નાણાકીય નિયામકો અને સરકારી બેંકોની ગત વર્ષે ઓક્ટોબરમાં ટીકા કરી હતી. આ ટીકા બાદથી જ જેક મા માટે મુશ્કેલીઓ ઉભી થવાનું શરૂ થયું હતું. ગત બે મહિનાથી તેઓ ગુમ છે, જેનાથી શી જિનપિંગ સરકાર સામે સવાલ ઉઠવા લાગ્યા હતા.

દુનિયાભરના કરોડો લોકોના આદર્શ રહેલા જેક માએ સરકારને આહવાહન કર્યું હતું કે, કે એવી સિસ્ટમમાં પરિવર્તન લાવવામાં આવે જે 'બિઝનેસમાં નવી વસ્તુઓ શરૂ કરવાના પ્રયાસને દબાવવા'નો પ્રયાસ કરે. તેમણે વેશ્વિક બેન્કિંગ નિયમોને 'વૃદ્ધ લોકોની કલબ' જણાવી હતી. આ ભાષણ બાદ ચીનની સત્તાધારી કોમ્યુનિસ્ટ પાર્ટી તેમના પર ભડકી હતી. તે પછી જેક માના બિઝનેસ પર અસાધારણ પ્રતિબંધ લગાવવાનું શરૂ કરાયું હતું.