આકર્ષક વેલ્યૂએશને ઇક્વિટીની ખરીદી વધારવા અત્યારે તક

71538414 દેવર્ષ વકીલ , હેડ – એડવાઈઝરી , પ્રાયવેટ બ્રોકિંગ એન્ડ વેલ્થ મેનેજમેન્ટ , એચડીએફસી સિક્યોરિટીઝ લિમિટેડ

I am Gujarat

અર્થતંત્ર હાલમાં ધીમું પડ્યું છે પરંતુ ઘણા બધા માઠા સમાચાર શેરના ભાવમાં પ્રાઇસ ઈન થઈ ગયા છે. ભારતના જીડીપી વૃદ્ધિદરમાં ઘટાડો એપ્રિલ-જૂન 2018 ક્વાર્ટરમાં શરૂ થયો હતો. આરબીઆઇએ વાસ્તવમાં જૂન અને ઓગસ્ટ 2018માં વ્યાજદરમાં બે વખત વધારો કર્યો હતો. તેમાં કુલ 50 બેસિસ પોઇન્ટ વધ્યા હતા અને ઊંચા ફુગાવાની અપેક્ષાએ ફેબ્રુઆરી 2019 સુધી ઊંચા દર રાખ્યા હતા.

ફુગાવાની ચિંતા ખોટી પુરવાર થઈ કારણ કે છેલ્લા 13 મહિનામાં ફુગાવો ધારણા કરતાં નીચો રહ્યો છે. આરબીઆઇએ બજારમાં તરલતાની સ્થિતિ ચુસ્ત રાખી. બેન્કિંગ સિસ્ટમમાં મે 2018થી જૂન 2019 સુધી નેગેટિવ લિક્વિડિટી રહી. જીડીપી વૃદ્ધિદર જૂન 2018થી દરેક ક્વાર્ટરમાં ઘટ્યો છે. Q4FY18માં 8.9 ટકા વૃદ્ધિદર હતો તે Q1FY20માં ઘટીને માત્ર પાંચ ટકા રહ્યો હતો.

RBIની MPCએ ફેબ્રુઆરી 2019માં રેટ કાપની શરૂઆત કરી પરંતુ તેમાં બહુ મોડું થઈ ગયું હતું. તેમણે વચન આપ્યું કે 4 ઓક્ટોબરની મિટિંગમાં તે વૃદ્ધિને ઉત્તેજન આપવા તમામ પગલાં લેશે.ભારતીય ચલણ સ્થિર રહેશે. ક્રૂડ ઓઇલની સ્થિતિ સાનુકૂળ છે તેથી વ્યાપાર ખાધની ચિંતા નહીં હોય. ડિસઇન્વેસ્ટમેન્ટથી નાણાં મળશે જેનાથી ખાધ નિયંત્રણમાં રહેશે. કોર્પોરેટ ટેક્સ રિલીફ પેકેજથી તે ખાધ રચાશે તેને સરકાર ડિસઇન્વેસ્ટમેન્ટ દ્વારા સરળતાથી ભરપાઈ કરી લેશે.

આ વર્ષે વરસાદ સરેરાશ કરતાં 10 ટકા વધુ છે અને છેલ્લાં 25 વર્ષમાં મહત્તમ વરસાદ પડ્યો છે. 27 સપ્ટેમ્બર મુજબ ભારતના મુખ્ય ડેમ 89 ટકા છલકાઈ ગયા છે. છેલ્લાં 10 વર્ષની એવરેજ 72 ટકાની હતી. ખરીફ પાકનું વાવેતર પૂર્ણ થયું છે અને કુલ એકરેજ ગયા વર્ષ જેટલું જ છે. આ વર્ષમાં પૂરતા પ્રમાણમાં ખાદ્યાન્ન ઉત્પાદનનો અંદાજ છે. સારા ચોમાસાના કારણે આ વર્ષમાં ખેતીની આવક વધશે. તેનાથી શિયાળામાં ખેડૂતો ઘઉં, ચોખા વગેરે પાકનું વાવેતર વધારશે, તેમની કમાણીની ક્ષમતા વધશે, ગ્રામીણ માંગમાં સુધારો થશે અને અર્થતંત્રને ટેકો મળશે.

સરકાર ચાલુ વર્ષના પાછલા છ મહિનામાં ઘણો ખર્ચ કરશે. સરળ નાણાકીય નીતિથી વ્યાજના દર વધુ ઘટશે. આગામી ક્વાર્ટરમાં આર્થિક વૃદ્ધિમાં સુધારાનો ટ્રેન્ડ જોવા મળશે.

એફપીઆઇ દ્વારા સિક્યોરિટીના વેચાણ પર થતા કેપિટલ ગેઇન પરના સરચાર્જ વિશે સરકારે સ્પષ્ટતા કરી તેનાથી ટેક્સની અનિશ્ચિતતા ઘટશે. વિદેશીઓ નેટ સેલર્સ છે અને તેનાથી ભાવને અસર થઈ છે. પરંતુ હવે બદલાઈ રહ્યું છે. સ્થાનિક અને વિદેશી સંસ્થાકીય રોકાણકારો સપ્ટેમ્બરમાં ખરીદદાર બન્યા છે. સેન્ટિમેન્ટ ખરાબ છે, વેલ્યુએશન નીચા છે. તેથી ખરીદી માટે સારો સમય છે.

વેલ્યુએશન આકર્ષક છે, ટેક્સ કાપના લાભથી ઇપીએસ સુધરશે, સેન્ટિમેન્ટ નરમ છે. હાલના સ્તરે ફંડામેન્ટલી મજબૂત પોર્ટફોલિયો રચવાનો સમય છે. તમે એસઆઇપી કરતા હોવ તો ચાલુ રાખો. ઇક્વિટીમાં રોકાણ વધારો અને વધુ સ્ટોક્સ ઉમેરો.

શેર્સની સીધી ખરીદી કરતા હોવ તો ટેક્‌નોલોજિકલ પરિવર્તનથી અસર થઈ ન હોય તેવી કંપનીઓ પસંદ કરો. ઇનોવેશનમાં આગળ હોય, પોતપોતાના સેક્ટરની લીડર હોય તેવી કંપનીઓ પસંદ કરો. પ્રાઇવેટ સેક્ટરની બેન્કના ત્રિમાસિક રિઝલ્ટમાં ડિફર્ડ ટેક્સ એસેટની વન ટાઇમ અસર જોવા મળી શકે છે.

<b>ડિસ્ક્લેમર :</b>વિવિધ બ્રોકરેજ , વિશ્લેષકો અને ફંડ મેનેજરો દ્વારા આ પાના પર દર્શાવાયેલા વિચારો તેમના પોતાના છે. વાચકોએ આ ભલામણોનો અમલ કરતાં પહેલાં વ્યાવસાયિક સલાહકારોની સલાહ જરૂરી છે. ઈટી અહીં દર્શાવેલી પસંદગી માટે જવાબદાર નથી. www.economictimes.com પર ઈટીના સિદ્ધાંતોની આચારસંહિતા ચકાસવા વિનંતી છે.