દેવાદાર કંપનીઓના શેરોમાં આકર્ષણ

રાજેશ માસ્કરન્હસ

મુંબઈ:રોકાણકારો દેવા હેઠળ ડૂબેલી કંપનીઓના શેરમાં ભારે ખરીદી કરી રહ્યા છે. આ કંપનીઓ તેમનું ઋણ ઘટાડવા માટે એસેટ અને બિઝનેસ વેચવાની પ્રક્રિયા કરી રહી છે. લગભગ એક ડઝન કંપનીઓના શેરમાં છેલ્લા એક મહિનામાં 25 ટકાથી 80 ટકા સુધી વધારો થયો છે.

આ કંપનીઓ પોતાનું ઋણ ઘટાડીને સ્થિતિ સુધારશે તેવી અપેક્ષાએ વોલ્યુમમાં વધારો થયો છે. આવી કંપનીઓમાં જે પી એસોસિયેટ્સ, જેપી ઇન્ફ્રાટેક, એમઇપી ઇન્ફ્રાસ્ટ્રક્ચર, એબીજી શિપયાર્ડ, રિલાયન્સ કોમ્યુનિકેશન્સ, જેબીએમ ઓટો, જીવીકે પાવર, રેન ઇન્ડસ્ટ્રીઝ અને જયપ્રકાશ પાવરનો સમાવેશ થાય છે.

ઇટીના એક અભ્યાસ પ્રમાણે જૂનની સરખામણીમાં જુલાઈમાં આ શેરમાં ડિલિવરી વોલ્યુમ બમણા કરતાં વધારે થયું છે. થિયરીની દૃષ્ટિએ જોતા રોકાણકારો કોઈ સ્ટોકની ડિલિવરી ત્યારે જ લેતા હોય છે જ્યારે તેમને શેરના દેખાવ અંગે વિશ્વાસ હોય.

છેલ્લા એક મહિનામાં સેન્સેક્સ બે ટકા જેટલો ઊંચકાયો છે જ્યારે બીએસઇ મિડ-કેપ અને સ્મોલ-કેપ સૂચકાંકો અનુક્રમે આ સમયગાળામાં 1.7 ટકા અને 2.9 ટકા વધ્યા છે. એનાલિસ્ટ્સે જણાવ્યું કે આ શેરોમાં રોકાણ ‘હાઈ રિસ્ક, હાઈ રિટર્ન’જુગાર સમાન છે.

મોતીલાલ ઓસ્વાલ પ્રાઇવેટ વેલ્થ મેનેજમેન્ટના એસોસિયેટ ડિરેક્ટર સંદીપ શાહે જણાવ્યું કે, બેન્કરપ્સી કોર્ટ સમક્ષ જતા કેટલાક કેસથી મેનેજમેન્ટને એ સમજાશે કે જો તેઓ આવશ્યક પગલાં નહીં લે અથવા કંઈક કામગીરી નહીં કરે તો તેઓ કંપનીનું નિયંત્રણ ગુમાવશે. કેટલીક કંપનીઓ ખરેખર અંકુશ ગુમાવશે.

આરબીઆઇએ તાજેતરમાં રિઝોલ્યુશન માટે 12 નોન પરફોર્મિંગ એસેટની યાદી બહાર પાડી હતી. આ એક ડઝન જેટલી કંપનીઓની બેડ ડેટનું પ્રમાણ લગભગ રૂ.2.2 લાખ કરોડ જેટલું થાય છે.

કોટક ઇન્સ્ટિટ્યૂશનલ ઇક્વિટીઝના સિનિયર એક્ઝિક્યુટિવ ડિરેક્ટર સંજીવ પ્રસાદે જણાવ્યું કે, શેરના ભાવમાં વધારો થવા પાછળ એક કારણ કદાચ એ હોઈ શકે કે બેન્કો પ્રમોટર બદલ્યા વગર અમુક ખોટ સહન કરવા માટે તૈયાર થઈ શકે છે. તેમાં એવી શરત હશે કે તેઓ કેટલીક એસેટ વેચી શકશે જેથી દેવા હેઠળ દબાયેલી આ કંપનીઓ માટે ડેટ-ઇક્વિટી રેશિયોમાં અંતે સુધારો થશે.ઇટીએ એવા કેટલાક શેર પર નજર નાખી છે જે તાજેતરમાં હાઈ ડિલિવરી વોલ્યુમના કારણે ઊંચકાયા છે.