NSE નિફ્ટી પહેલીવાર 10kની સપાટીને સ્પર્શ્યો

મુંબઈ: મજબૂત કંપની પરિણામોની અપેક્ષાઓના ઘોડા પર સવાર થઈને તેમજ વૈશ્વિક બજારોના પોઝિટિવ વલણના ટેકા સાથે NSE નિફ્ટી ઈન્ડેક્સે મંગળવારે પહેલીવાર 10,000ની મનોવૈજ્ઞાનિક સપાટીને સ્પર્શ કરીને ઈતિહાસ રચ્યો હતો.

આજે સવારે 9.15 વાગ્યે જ નિફ્ટીએ 10,000ની મનોવૈજ્ઞાનિક સપાટી વટાવી હતી. સોમવારના બંધની સરખામણીમાં બજાર ઉપરમાં ખૂલ્યું હતું. રિઝર્વ બેન્ક આગામી પોલિસી બેઠકમાં વ્યાજદરમાં ઘટાડો કરશે તેવી આશા, વિદેશી મૂડીરોકાણના અવિરત પ્રવાહ અને દેશની આર્થિક વૃદ્ધિની ગતિ વધવાની ધારણાના બળે નિફ્ટીએ આજે આ ઐતિહાસિક સપાટી સર કરી હતી.

આજે સવારના ટ્રેડિંગમાં નિફ્ટીએ 10,011.30 પોઈન્ટની ઊંચી સપાટી અને 9,954.70 પોઈન્ટની નીચી સપાટીને સ્પર્શ કર્યો હતો.

સવારે 10.15 વાગ્યે નિફ્ટીનો સુધારો થોડો ધોવાઈ ગયો હતો અને તે 9,971.80 પોઈન્ટની સપાટીએ ટ્રેડ થઈ રહ્યો હતો.

HDFC સિક્યુરિટીઝના રિટેલ રિસર્ચ હેડ દીપક જસાણીએ જણાવ્યું હતું કે, વૈશ્વિક બજારોની પોઝિટિવ ચાલ અને સ્થાનિક બજારમાં સતત જોવા મળી રહેલા મોમેન્ટમને પગલે નિફ્ટીએ આજે પહેલીવાર ઈન્ટ્રા ડેમાં 10,000ની સર્વોચ્ચ સપાટી વટાવી હતી.

ટ્રેડબુલ્સના ચીફ ઓપરેટિંગ ઓફિસર ધ્રુવ દેસાઈએ કહ્યું હતું કે, પ્રોત્સાહક ત્રિમાસિક પરિણામો આવવાની ધારણાએ બજારમાં તેજી તરફી હવામાન જોવા મળ્યું હતું.

નિફ્ટી-50 ઈન્ડેક્સમાં 12 જેટલા વિવિધ સેક્ટર્સના કુલ 50 શેર્સ સામેલ છે.